Müqavilə ilə “Fənərbaxça”ya məxsus olan və icarə əsasında bundesliqa təmsilçisi “Auqsburq”da forma geyən Mergim Berişa ilə bağlı maraqlı məlumat var.

"Football-plus.az" xəbər verir ki, 24 yaşlı futbolçu Bavariya klubunun heyətində sərgilədiyi oyunla Almaniya yığmasının məşqçilər korpusunun diqqətini cəlb etməyi bacarıb. Nəticədə bundestimin baş məşqçisi Hans-Diter Flik onun adını qarşıdakı yoldaşlıq oyunları üçün dünən açıqlanan 26 nəfərlik siyahıya salıb. Almaniya AÇ-2024-ə evsahibliyi edəcəyindən seçmə mərhələdə iştirak etmir. Almanlar martın 25-də Peru, 28-də isə Belçikaya qarşı yoldaşlıq oyunu keçirəcək. Flikin açıqladığı siyahıda Berişadan başqa daha 4 yeni isim var. Bunlar Yoşa Vaqnoman (Leyptsiq), Marius Volf (Borussiya D), Kevin Şade (Brentford) və Feliks Nmeçadı (Volfsburq). Flikin Zyule, Müller, Gündoğan, Sane, Rüdiger kimi təcrübəli və tanınmış oyunçulara dəvət göndərməməsi diqqəti çəkib. Noyer isə zədə üzündən yığmadan kənar qalıb.

Berişanın yığmaya dəvət alması “Fənərbaxça” fanatları arasında da geniş müzakirələrə səbəb olub. İstanbul nəhəngi kosovoəsilli almaniyalı hücumçunu 2021-in yayında 5 milyon avroya “Zaltsburq”dan transfer etmişdi. 24 yaşlı forvard “sarı-lacivərdlilər”in heyətində 32 rəsmi oyunda 8 qol, 3 məhsuldar ötürməlik performans sərgiləmiş və oyunu ilə fanatların rəğbətini qazana bilməmişdi. Məhsuldarlığının aşağı olması və qol vəziyyətlərini boşa verməsi üzündən tənqid atəşinə tutulan Berişa ötən yay baş məşqçi postuna gətirilən Jorje Jezuşun da gözünə girə bilməmişdi. Mövsümə “Fənər”də başlamasına, hətta 1-ci turda “Ümraniyəspor”la oyunda (3:3) komandasını məğlubiyyətdən xilas etməsinə baxmayaraq, İstanbul nəhəngi onun üstündən faktiki xətt çəkərək forvardı cəmi 300 min avro qarşılığında “Auqsburq”a icarəyə göndərdi. Bavariyalılar mövsümün sonunda onu 4 milyon avroya daimi əsasda transfer edə bilmək hüququna da malikdilər. Berişa gözlənilmədən yeni klubunda adından söz etdirməyi bacardı. O, cari mövsüm “Auqsburq”un heyətində 18 bundesliqa matçında 12 qolda yaxından iştirak edərək 8 qol, 4 məhsuldar ötürməlik performans sərgiləyib. Özü də 8 qoldan 3-nü “Bavariya” ilə oyunlarda vurub! “Auqsburq”un onu birdəfəlik heyətinə qatacağı şübhə doğurmur. Berişa daha öncə Almaniyanın U-21 yığmasında keçirdiyi 11 oyunda 1 qol vurub.

ƏLİ