Türkiyə mətbuatında çərşənbə günü sürpriz bir iddia ortaya atıldı.

“Football-plus.az” xəbər verir ki, “Fanatik” nəşrinin ortaya atdığı xəbəri qısa müddətdə bütün idman saytları paylaşdı. Söhbət yığmanın baş məşqçisi Ştefan Kuntsun istefaya göndərilməsindən gedir. Almaniyalı mütəxəssislə tezliklə, daha doğrusu, gələn həftə yolların ayrılacağı iddia edildi. Hətta deyilənə görə, Türkiyə Futbol Federasiyasının idarə heyətinin üzvü və yığmaya cavabdehıik daşıyan əsas yönətici statusunda olan Həmit Altıntop “Trabzonspor”dan ayrılandan sonra hazırda işsiz olan Abdulla Avcı ilə ilkin razılıq da əldə edibmiş. Yığmanın yeni məşqçilər korpusunun tərkibi də bəlli imiş. Guya ötən mövsüm qısa müddət “Beşiktaş”ı çalışdıran Öndər Karavəli, eləcə də Egemən Korkmaz və hətta karyerasını başa vurmayan Burak Yılmaz yeni dönəmdə Avcının əsas köməkçiləri olacaqmış. Amma srağagün federasiya rəhbəri Mehmet Büyükekşi jurnalistlərlə görüşdə bu xəbəri təkzib etdi və başqa məqamlara da toxundu:

İlin-günün bu vaxtı heç bir ciddi səbəb olmadan Kuntsun istefaya göndərilməsi həqiqətən də qəribə olardı. Düzdü, qardaş ölkənin komandası bu məşqçi ilə fenomenal nəticələr əldə etmir. Amma digər tərəfdən nəticələri bərbad adlandırmaq da olmaz (16 oyun, 10 qələbə, 2 heç-heçə, 4 məğlubiyyət). Türkiyə hər nə qədər zəif rəqiblərlə qarşılaşsa da, son Millətlər Liqasında qrupunu lider kimi tamamlayıb. AÇ-2024-ün seçmə mərhələsinə komanda 1 qələbə, 1 məğlubiyyət ilə start verib. Yəni Kuntsun tələm-tələsik qovulması üçün ciddi səbəb yoxdu. Bəs onda bu xəbərlər hardan peyda olub? Bu sualın cavabını federasiyanın və “Fənərbaxça”nın sabiq yönəticisi Səlim Soydan verib. Onun iddiasına görə, Kunts hər nə qədər bu vəzifəyə Altıntopun təkidi ilə gətirilsə də, bu ikilinin münasibətləri pozulub. Səbəb isə odu ki, Kunts son matçların birində Altıntopun israrla oynadılmasını tələb etdiyi bir futbolçunu meydana buraxmaqdan boyun qaçırıb! Son dönəmlərə qədər Altıntopun belə məsləhətlərini həmişə nəzərə alan almaniyalı nədənsə bu dəfə bildiyini edib. Altıntop da həmin vaxtdan bəri Kuntsun istefaya göndərilməsinə çalışır. Altıntop bu məsələni federasiyanın idarə heyətində müzakirəyə çıxarsa da, onun istefa ilə bağlı təklifini başqaları dəstəkləməyib. Bu üzdən Həmit bir növ acığa düşərək Avcı ilə görüşüb. Mətbuatda yayılan iddiaların səbəbi də məhz budu. İyunda federasiyada növbəti prezident seçkisi nəzərdə tutulub. Büyükekşi də bunu nəzərə alaraq dönəminin bitməsinə ayyarım qalmış yığmanın məşqçisini dəyişmək istəməyib.