"Elə bir vəziyyətdi ki, nə deyəcəyimi bilmirəm. Yetirmələrim meydanda əzmkarlıq göstərir, döyüşür, can qoyur, amma bəhrəsini görmürük. Oyunda diqtə edən tərəf bizik, amma rəqib qələbə qazandı. Meydanda maksimum gənclərə şans verirəm. 2003-05 təvəllüdlü uşaqları sınayıram. Onların gələcəyi bizim üçün əsasdı. İnanıram ki, bu gənclər gələcəkdə sözlərini deyəcək.

İlk hissədə azlıqda qalmağımıza baxmayaraq, yaxşı çıxış etdik. Hesabı bərabərləşdirdik, qələbə qolu üçün də cəhdlər etdik, alınmadı. Qırmızı vərəqəyə gəlincə, futbolçularımın əksəriyyəti hələ də Region Liqası ab-havasında qalıb. Çalışırıq onları ayıldaq və izah edək ki, 1-ci divizion peşəkar liqadı. Burda necə gəldi oynaya bilməzsən, hər şeyə diqqət yetirməlisən. “Qırmızı” məhz o ab-havanın nəticəsidi. Səni təxribata, qarşıdurmaya çəkə bilərlər, amma özünü saxlamalısan. Peşəkar futbolçu olmaq yolunda səbr, təmkin vacibdi. Epizoda bir daha baxıb, Elariz Xəlilliyə iradımı çatdıracam. Yetirmələrim anlamalıdı ki, peşəkar futbolçu heç nədən “qırmızı” almamalıdı.

4 minə yaxın azarkeş stadiona toplaşmışdı. Onların hər birinə minnətdarlığımı bildirirəm. Qazonun yararsız vəziyyətə düşməsi hava şəraitiylə bağlıdı. Oyundan bir gün əvvəl yağış yağmışdı. Futbolçular meydanda isinmə hərəkətləri edəndə ot örtüyü bir az da pisləşdi. Üstəlik, matçın startında da yağış yağdı".