"Avrokuboka ən qısa yol kubokdan keçir. Ona görə də burda oyunlar daha intriqalı alınır. "Neftçi" ilk oyunda səfərdə məğlub olsa da, cavab görüşündə, əsasən də son 10 dəqiqədə meydanda böyük əzmkarlıq göstərdi. Qısası, "ağ-qaralar" çətinliklə finala çıxdı. "Turan Tovuz" da çox istəkliydi. Elə bunun sayəsində də yarımfinala qədər irəliləyə bilmişdilər. Ayxan Abbasovun yetirmələri həm çempionatda, həm də kubokda güclü rəqibləri sıradan çıxarmaqla çoxlarını təəccübləndirdi.

"Neftçi"ylə cavab oyununda həm bəxt amili onlardan uzaq düşdü, həm də rəqibin heyətindəki futbolçuların ustalıq səviyyəsi sözünü dedi. Amma Tovuz təmsilçisi düzgün yoldadı. Elitaya bu mövsüm qoşulmalarına rəğmən, yaxşı mübarizə apardılar. Növbəti mövsümdən daha iddialı olacaqlarına inanıram. "Qəbələ" ilə "Səbail" arasındakı hər iki oyun gərgin keçdi. Bölgə təmsilçisi qalib gəlsə də, "Səbail"in də pis çıxış etmədiyini düşünürəm. "Qəbələ" aşkar üstün oldu” demək düz olmaz. "Qırmızı-qaralar" topla oyun, qol epizodları və son nöqtəni qoymaq baxımından rəqibdən bir qədər üstün idi. "Səbail" ilk oyunda uduzmasaydı və ya cavab matçında hesabı açan tərəf olsaydı, cütün taleyi fərqli ola bilərdi. İstənilən halda, "Səbail"lə "Turan Tovuz" bura qədər gəlib çıxıbsa, onlara təşəkkür düşür.

Kubokun finalının "Neftçi" - "Qəbələ" dueli bəlkə də mövsümün akkordunu vuracaq. Amma bir məqamı da unutmamalıyıq. Çempionatla müqayisədə kubok turniri gec bitir. Final oyunu iyundadı. Həmin vaxta qədər hər iki komandanın futbolçularının hazırkı tonusu qoruya bilib-bilməməsindən də çox şey asılı olacaq".