2023-cü ilin əvvəli “Milan” üçün çox pis keçdi. İtaliyanın son çempionu ilin ilk oyunlarında özünə heç bənzəmədi.

"Football-plus.az" xəbər verir ki, nəticələr cari mövsümün DÇ-2022-nin final turnirindən əvvəlki mərhələsi ilə müqayisədə, sadəcə, acınacaqlı idi. Amma indi vəziyyət böyük ölçüdə dəyişib.

Ardıcıl 7 qələbəsiz oyun
Stefano Pyolinin komandası onsuz da Qətərdə ötən ilin son aylarında keçirilən dünya çempionatı ərəfəsində mövqelərini əldən vermişdi. Çempionlar Liqasında (ÇL) son 8 ildə ilk dəfə 1/8 finala vəsiqə qazanan “Milan” A seriyasında fasiləyə 2-ci yerdə yollanmışdı. Noyabrın 13-nə olan vəziyyətə görə, çempion lider “Napoli”dən 8 xal geri qalırdı. Bu isə kiçik fərq sayıla bilməzdi.

Mundialdan sonra milanlıların işləri daha da pisləşdi. Yanvarın 4-də səfərdə “Salernitana”dan çətinliklə 3 xal alan (2:1) Pyolinin komandası çempionatdakı növbəti 5 matçda yalnız 2 xal qazana bildi: “Roma” və “Leççe” ilə oyunlar 2:2 hesabıyla nəticələndi. “Latsio”ya səfərdə 0:4, “Sassuolo”ya evdə 2:5 hesabıyla uduzan “Milan” fevralın 2-də derbidə “İnter”dən bir cavabsız top buraxdı. Başqa sözlə, 5 çempionat oyununda 13 xal itirildi. Nəticədə “qırmızı-qaralar” 21-ci turdan sonra özlərini turnir cədvəlində 6-cı yerdə tapdılar.

Lombardiyalıların bu arada daha iki zərbə aldıqlarını da xatırlatmalıyıq: yanvarın 10-da İtaliya kubokunun “Torino” ilə ev oyununda minimal hesabla uduzan Pyolinin komandası mübarizəni 1/8 finalda dayandırdı. Həmin ayın 18-də isə İtaliya Superkuboku matçında “İnter” qarşısında aciz qalan (0:3) “Milan” daha bir zərbə aldı. Nəticədə belə üzücü mənzərə formalaşdı: müxtəlif turnirlərdə ardıcıl 7 qələbəsiz oyun: 2 heç-heçə, 5 məğlubiyyət...

Ardıcıl 4 “quru” qələbə
Əlbəttə, çempionun daxili yarışlarda mövqelərini niyə bu dərəcədə əldən verməsi sual doğurmaya bilməzdi. Bu sualın ilk cavabı “Milan”ın əsas dərdinin zədə amili olduğu ilə bağlı idi. Bu mövsüm sıradan çıxanların sayının həddən artıq olması Pyolini optimal heyətdən yararlanmaq imkanından məhrum etdi. Üstəlik komandaya yayda qoşulan yeni oyunçuların çıxışı böyük ölçüdə məyusluq doğururdu.

Bu problemlər müəyyən dərəcədə indi də davam edir. Amma nəticələr 180 dərəcə dəyişib. “Milan” çempionatda “İnter”ə məğlubiyyətdən sonra keçirdiyi hər üç oyunda qalib gəlib. Özü də “Torino” (1:0), “Montsa” (1:0) və “Atalanta” (2:0) ilə matçlarda qapısından top buraxmayıb. Çempionun fevralın 14-də ÇL-in 1/8 finalının ilk oyununda “Tottenhem” üzərində də “quru” qələbə (1:0) qazandığını nəzərə alsaq, statistika daha gözəl mənzərədən xəbər verər: ardıcıl 4 “quru” qələbə.

Pyoli sxemi dəyişməli oldu
Ortaya bu sual da çıxır: necə oldu ki, qələbəsizlik qələbə seriyası ilə müşayiət olundu? Uğursuzluqların sıralanması Pyolini yeni oyun sxemi üzərində düşünməyə vadar etməyə bilməzdi. 57 yaşlı mütəxəssis taktikanı dəyişməli oldu. O, ilk eksperimenti “İnter”ə qarşı oyunda etməyə qərar verdi. Komandasını derbiyə üç müdafiəçi sxemi ilə çıxardı. “Milan” əzəli rəqibdən bu dəfə yalnız bir top buraxdı. Amma müdafiə və hücum xətti yenə kəskin tənqidlərə məruz qaldı.

Derbidəki növbəti uğursuzluq Pyolini çox da təlaşa salmadı. Komanda məşqlərdə yeni sxemi tədricən mənimsədikcə və baş məşqçi start heyətini yenidən müəyyən etdikcə nəticələr göz oxşamağa başladı. Mütəxəssislər ardıcıl 4 “quru” qələbəyə məhz üç müdafiəçidən ibarət sxemin şərait yaratdığını deyirlər. Bu sxem komanda oyununu balanslaşdırıb: “Milan” son oyunlarda rəqiblərindən çox təhlükəli vəziyyət yaradıb və öz qapısı qarşısında minimum sayda qol vəziyyətinin yaranmasına imkan verib. Yeni sxemin tətbiqindən sonrakı mənzərə ilə bağlı bir sıra detallara və məqamlara göz gəzdirək.

* “Opta” statistika şirkətinin məlumatına görə, “Milan” ardıcıl 4 “quru” qələbəyə 2018-ci ilin fevralından sonra ilk dəfə nail olub. Onda komanda ardıcıl 5 matçda top buraxmadan qalib gəlmişdi. İki oyunun Avropa Liqasında “Ludoqorets”ə (Bolqarıstan) qarşı keçirildiyini də qeyd edək.
* Yeni sxemin qəhrəmanlarından biri Malik Tiavdı. 21 yaşlı alman müdafiəçi ötən ilin avqustunda 7 milyon avroya “Şalke-04”dən alınıb. Gənc futbolçu mövsümün ilk dövrəsində, demək olar ki, meydanda görünməmişdi. Amma üç mərkəz müdafiəçisindən ibarət sxemə əla uyğunlaşa bilib.
“İnter”ə qarşı oyunda meydana sonradan çıxan Malik növbəti 4 matçda ilk dəqiqələrdən oynamaq imkanı qazanıb. Və bu oyunlarda olduqca inamlı təsir bağışlayıb. “Whoscored” portalı onun çıxışını hər dəfə 7 baldan yüksək qiymətləndirib.
* Driblyor Junior Messias üçün də yeni rol tapılıb. Pyoli ondan yarımmüdafiənin sağ cinahında yararlanmağa başlayandan sonra braziliyalı A seriyasının ardıcıl iki turunda qol vurub. O, “Montsa” ilə oyunda yeganə, “Atalanta” ilə son matçda isə ikinci qolun müəllifi olub. Qeyd edək ki, Junior “Milan”da çıxış etdiyi iki mövsüm ərzində ilk dəfə ardıcıl iki matçda qapıya yol tapıb. Buna daha əvvəl “Krotone”də nail olmuşdu.
* Pyoli sxemi dəyişməsinin səbəblərindən birinin aparıcı oyunçuların zədələnməsi ilə bağlı olduğunu etiraf edib. Amma “Atalanta” ilə matçda ii vacib futbolçu sıraya dönüb. Qapını ilk dəqiqələrdən Mayk Menyan qoruyub, Zlatan İbrahimoviç isə 2-ci hissədə meydana çıxıb. İkinci qol vəziyyətində iştirak edən isveçli hücumçu klubun tarixinə A seriyasında oynayan ən yaşlı (41 yaş 146 gün) futbolçu kimi düşüb.
Əvvəlki sxemdən imtina olunmayıb

Çox güman, Pyoli üç müdafiəçili sxemdən müvəqqəti istifadə edir. Baş məşqçi bütün zədəli oyunçular sıraya dönəndən və optimal formaya düşəndən sonra ötən mövsüm uğur gətirən aqressiv pressinqə malik 4-2-3-1 taktikasına qayıda bilər. Hələlik isə onun komandasına nəticə lazımdı: bu mövsüm “ÇL zonası”na düşmək uğrunda mübarizə çox maraqlı gedir. Hazırda 4 yer uğrunda 6 komandanın yarışdığı görünür. Lider “Napoli”nin vəsiqələrdən birinə sahib çıxacağı heç kimdə şübhə doğurmur. “İnter”, “Milan”, “Latsio”, “Roma” və “Atalanta” arasındakı xal fərqi elə də çox deyil. Bu komandalarla rəqabətə hesabından 15 xal çıxılan “Yuventus” da qoşula bilər. Bir sözlə, “Milan” mövsümün qalan hissəsində mümkün qədər çox xal yığmağa məcburdu.