"İsveçin belçikalılara məğlubiyyətdən sonra Azərbaycan yığmasını hansı hirslə gözlədiyi öncədən bəlli idi. Görüşün qadın referiyə həvalə edilməsi də güc balansının kimin tərəfində olmasının göstəricisi idi. Vəziyyət elə həddə çatıb ki, yığmanın matçlarında hakim idarəçiliyi yox, nəhayət, Azərbaycan futbolunda yaradılmış biabırçı durumun səbəbləri araşdırılmalı, qəti, köklü islahatlara start verilməlidi. İki oyunda qapısında 9 top görən komandanın oyunlarında referinin mühakiməsi yox, böyük ölçüdə məşqçi, futbolçular da deyil, daha ciddi məsələlər müzakirə edilməli, dövlət tərəfindən illərdi sabit maliyyənin, milyonların ayrılmasına baxmayaraq, AFFA rəhbərliyinin ölkə futbolunu bataqlığa sürükləməsinə cavab verməsi prosesinə start verilməlidi. 2024-cü ildə federasiyada keçiriləcək seçkini gözləməyə, itirilmiş illərin üstünə daha birini əlavə etməyə də ehtiyac yoxdu. Yığma ilə Avstriya, İsveç səfərinə yollanmış bir "komandalıq” rəhbər heyət yolüstü Parisə səfər edib ideoloqları ilə "vəziyyətdən çıxış yollarını" düşünməlidirlə. Vəsaiti də "əlavə xərclər" xanasına əlavə edərlər..."