Əfqan Həmzəyev bosniyalılarda ciddi qüsur tutmayıb
Srağagünkü "Qarabağ" - "Sürix" matçını Bosniya və Hersoqovinadan olan hakimlər briqadası idarə etdi.
Ağdamlıların 3:2 hesabıyla qalib gəldiyi oyunda "köhlən atlar"ın qapısına vurulan birinci qolu Qurban Qurbanov ofsayd epizodu kimi qiymətləndirdi, ikinci qolu isə rəqib penaltidən vurdu.
Ofsayddan buraxdığımız qol və penalti qərarı, ümumilikdə hakimlərin oyunda ədaləti necə qoruduğu ilə bağlı təcrübəli referi Əfqan Həmzəyevin fikirlərini öyrəndik: "Bosniya və Hersoqovinadan olan hakimlər briqadasının idarə etdiyi oyunda, şübhəsiz, səhvlər var idi. "Qarabağ"ın qapısına ilk qol ofsayddan vuruldu. Top oyunçunun ayağından çıxan anda rəqib futbolçu qapıçı meydançasında oyundankənar vəziyyətdə idi. Həmin epizod birbaşa yan xətt hakiminin səhvi idi. FİFA-nın əvvəlki qanunlarına görə laysmanın matç zamanı səhv qərarları birbaşa baş hakimin və briqadanın səhvi sayılır və qiymətləndirməyə təsir göstərirdi. Yeni qaydalara görə isə hər kəsin öz funksiyası var və hər hakim ayrılıqda qiymətləndirilir. Yəni baş hakim tutduğu mövqedən laysmanın hansısa səhvini düzəltmək iqtidarında deyilsə, bu hal matçsonrası qiymətləndirməyə təsir etmir. Penalti epizoduna gəlincə, cərimə meydançasında rəqib futbolçuya qarşı ikili sıxışdırma və topsuz ayağa təmas var. Bu, sarı vərəqəsiz cərimə zərbəsidi və hakimin qərarı doğrudu. Referinin başqa kobudluqlara, əsasən də müdaxilələrə görə qeydə aldığı qayda pozuntularına görə verdiyi sarı vərəqələrin hamısı haqlı idi. Kodudluq edən hər iki komandanın oyunçularına münasibətdə güzəştsiz, amma haqlı cəzalar təyin etdi. "Qarabağ"ın qapısına ofsayddan vurulan qolu nəzərə almasaq, hakimlər ədaləti maksimum qorumağa çalışdılar. Mən hakim-inspektor olsaydım, baş hakimə 8,3, səhv qərar verən laysmana 8,1, digər yan xətt hakiminə 8,3, ümumilikdə briqadaya 8,3 qiymət verərdim".
ABDULLA İSMAYILOĞLU
Digər xəbərlər
