Artıq xəbər verdiyimiz kimi, “Mançester Yunayted” bazar günü Erik ten Haq dönəmində ilk titulu qazandı. Liqa kubokunun finalında “Nyukasl” məğlub edildi (2:0). Qələbə topu isə Kazemironun hesabındadı.

Braziliyalı təkcə qol vurmadı, həm də müdafiədə inanılmaz həcmdə iş gördü. “Nyukasl” topa daha çox nəzarət etsə də, böyük çətinliklə təhlükəli vəziyyət yaradırdı – bu da Kazemironun xidmətidi. MY azarkeşlərinin məhz onu oyunun ən yaxşısı seçməsi təsadüfi deyil.

Komanda Kazemironun şəxsində belə vacib oyunların dəlisi olan hazır çempion qazanıb. Braziliyalı ardıcıl 9 finalda qalib gəlib: bunlardan 4-ü Çempionlar Liqasının, 3-ü klub dünya çempionatının, 1-i İspaniya kubokunun, 1-i də Liqa kubokunun payına düşür.

Kazemiroya görə “Yunayted”i tənqid edirdilər
Açıq etiraf etmək lazımdı ki, yayda Kazemironun “Mançester Yunayted”ə keçidi əksər ekspertlərdə narazılıq doğurmuşdu. Hamıdan çox səsini ucaldan Hari Nevill idi. Düzdü, o, Kazemironu yox, klubun transfer siyasətini tənqid edirdi: “Mən indi keçidlərə görə heyranlıq duymuram, ona görə ki, bunların yayın əvvəlində planlaşdırılmadığını bilirəm. Başqa klublar gündə bir hədəf dəyişmir. Hər şey De Yonqdan başladı, sonra Rabyo peyda oldu, nəticədə yay kluba 160 milyon funta – nəhəng məbləğə başa gələn Kazemironun transferi ilə bitir. Düşünürəm ki, o, yaxın bir neçə ildə kluba fayda verəcək. Ancaq həmin iki ildən sonra kimsə artıq zirvə dövrünü arxada qoyan futbolçunu daha az maaşla alacaq. Futbolçu ilə belə müqavilə bağlamaq üçün böyük inam olmalıdı. 30 yaşlı futbolçu ilə 5 illik müqavilə bağlamazlar”.

Nevill Kazemironun bacarığına şübhə edən yeganə adam deyildi. Məsələn, MY-nin sabiq qapıçısı Peter Şmeyhel və əksər fanatlar da oxşar fikir söyləmişdi. “Yunayted” son illərdə belə transferlər üzündən hədsiz çox yanıb.

İndi isə çoxları Kazemironun gəlişini 90-cı illərdə Erik Kantonanın alınmayı ilə müqayisə edir. Bu təcrübəli futbolçu komandaya zəruri keyfiyyətlər qazandırmış, çempionluq aşılamışdı.

Kazemirolu və onsuz MY iki fərqli komandadı
Kazemiro MY-də keçirdiyi ilk oyunlarda sonradan meydana çıxırdı. Belə hesab olunur ki, Ten Haq onda debütanta komandada kimin əsas söz sahibi olduğunu göstərmək istəyirmiş. Əslində braziliyalı dayaq yarımmüdafiəçisi, sadəcə, baş məşqçinin tələblərinə öyrəşir və hazırlaşırdı.
Oktyabrın əvvəlində “Everton”a qarşı keçirilən oyunda Kazemiro, nəhayət, start heyətində göründü və beləcə “Yunayted”in faktiki öz qapısı önündə heç bir təhlükə yaranmasına imkan vermədiyi 5 oyunluq seriya başladı. “Everton”, “Omoniya”, “Nyukasl”, “Tottenhem” və “Çelsi” ilə oyunlarda rəqiblərin yaratdığı qol vəziyyətlərinin ortalama göstəricisi 1,36-ya bərabər idi.

Fevralda “Arsenal”dan alınan məğlubiyyətdən sonra (Kazemiro sarı vərəqə limitinə görə oyunu buraxırdı) braziliyalının komandanın müdafiədəki oyununa təsirini göstərən statistika üzə çıxdı:
• braziliyalının start heyətində göründüyü 13 oyunun yalnız birində komanda uduzub. Kazemirosuz isə 10 oyunda 4 məğlubiyyət var;
• Kazemirolu “Yunayted” 90 dəqiqə ərzində 1 qoldan az buraxır. Onsuz isə 1,9 qol;
• Kazemiro start heyətində görünməyəndə Ten Haqın komandasının qapısına orta hesabla 16 zərbə vurulur. O əsas heyətdə olanda isə zərbələrin sayı 7-yə düşür.

Kazemironun indiki MY üçün önəmini belə izah etmək olar: həm hücumların qurulmasında, həm də rəqib hücumlarının dağıdılmasındda faydalıdı. Kazemironun yoxluğu “Yunayted” üçün ciddi itkidi. Bəlkə də braziliyalı konkrer oyunun axarını dəyişməyə qadir deyil. Ancaq o, cinahları “sığortalamaqda”, dayaq zonası ciddi təzyiqə məruz qalanda düzgün qərarlar verməkdə ustadı. Təəssüf ki, Maktominey tam başqa səviyyədi. Skott işgüzardı, rəqibdən yaxşı top alır, ancaq “oyunu oxumaq” bacarığında Kazemiroya uduzur. Braziliyalının mövqe seçimi və reaksiyaları da əladı. O, adətən, ən çətin sınaqların belə öhdəsindən gəlir.

Braziliyalı dayaq yarımmüdafiəçisi üçün mövsüm əla keçir. “Nyukasl”ın qapısına yol tapmaqla cari mövsümdəki 5-ci qolunu vurdu. Onun ən məhsuldar mövsümü 2020/21 olub (“Real”da 7 qol vurub), amma bu gedişlə şəxsi rekordunu yeniləməsi də tam realdı.

Bəlkə də bir neçə ildən sonra Hari Nevillin proqnozu düz çıxacaq - Kazemiro yaşa dolacaq və problemə çevriləcək. Ancaq hələ ki braziliyalı MY-nin müdafiəsini və orta sahəsini çempionatda ən yaxşılar səviyyəsinə qaldırıb. Və son 6 ildə komandaya ilk titulu qazandırıb. Tam xoşbəxtlik üçün başqa nə lazımdı ki?!