"İmişli" qış fasiləsindən sonra ilk qələbəsini qazanıb. Komanda 19-cu turda səfərdə "Mingəçevir"i 2:0 hesabıyla məğlub edib. Qonaqların heyətində Bayram Əliyevlə Ülvi İbadzadə fərqlənib.

Bununla bağlı "İmişli"nin baş məşqçisi Ruhid Usubovdan açıqlama aldıq. Mütəxəssisin “Football-plus.az” saytına söylədikləri belə oldu:

"Xeyli vaxt idi qələbəyə və xala həsrət idik. Ardıcıl məğlubiyyətlər üzündən komandada psixoloji gərginlik vardı. Bunun aradan qalxması üçün davamlı söhbətlər etdik. Sağ olsunlar, uşaqlar dünən meydanda vuruşub qələbə qazandılar. Bu qələbəyə çox ehtiyacımız vardı. İlk dövrə də belə hala üzləşmişdik. Lakin "Zaqatala" üzərində qələbədən sonra həm oyun planında “artırdıq”, həm də xallar qazandıq. İnanıram ki, "Mingəçevir" üzərində qələbədən sonra da eyni ssenari təkrarlanacaq. Heyətdə gənc futbolçular çoxdu. Oyundan-oyuna “artırırlar”. Qələbələr həm də İmişlidə futbolun yenidən canlanmasına təkan verəcək. İnşallah, davamı gəlsin".

ABDULLA İSMAYILOĞLU