Həftəsonu Yuta ştatının Solt-Leyk-Siti şəhərində MBA Ulduzlarının oyunu keçirildi. Yannis Adetokumbonun komandası (Şərq) Lebron Ceymsin komandasına (Qərb) qalib gəldi - 184:175.

Bu oyunun qaydasına görə, 182 xalı birinci toplayan komanda qalib elan olunur. Yannisin komandasına qələbəni Demien Lillardın üçxallıq atışı qazandırdı. Şərq konfransının komandasının heyətində “Boston”un forvardı Ceyson Teytum hamıdan çox – 55 xal topladı. Qərb konfransının komandasında ən məhsuldar oyunçular “Boston”un müdafiəçisi Ceylen Braun (35) və “Dallas”ın oyun qurucusu Kayri İrvinq (32) oldu.

Matçın ən dəyərli oyunçusu üçün ayrılan və 2020-dən bəri mərhum Kobi Brayantın adını daşıyan mükafat 24 yaşlı Teytuma təqdim olundu. O, Ulduzların oyunu üçün yeni xal rekordu (55) müəyyənləşdirdi. Əvvəlki rekord 2017-də keçirilən oyunda 52 xal toplayan Entoni Devisə məxsus idi.

Ulduzların oyununa 19-cu dəfə dəvət olunan Lebron Ceyms isə cəmi 13 xal topladı. Hər halda, “Leykers”in forvardı belə oyunlarda iştirak sayına (19) görə yeni rekord müəyyənləşdirdi. 38 yaşlı basketbolçu Ulduzların oyununda 19 dəfə start heyətinə düşüb ki, bu da MBA rekordudu. Lebron Ulduzların oyununda 2005-ci ildə debüt edib. Lebron belə oyunlara çağrılmaq sayına görə “Leykers”in əfsanəvi mərkəz oyunçusu Kərim Əbdül-Cabbarla birgə liderliyi bölüşür.