“Gərgin oyun olmasına baxmayaraq, hər iki komanda mövqeyini qorudu. Fikrimcə, “Qarabağ” meydandan qazanclı ayrıldı. “Sabah” qalib gələrək xal fərqini azaltsaydı, “köhlən atlar”ın liderliyi təhlükə altına düşə bilərdi. Matçın bərabərsəviyyəli olduğunu demək mümkündü. Komandaların performasına əsaslanaraq 1:1 hesabının ədalətli nəticə olduğunu söyləmək olar. “Sabah”ın daha sabit və rahat oynadığını, oyun planına uyğun hərəkət etdiyini müşahidə etdim. Məncə, üstünlük onlarda idi. Buna uyğun olaraq da “tələbələr”in xal itirdiyini düşünürəm. Çünki fürsətdən yararlanıb “Qarabağ”ı məğlub edə bilərdilər. Amma növbəti qarşılaşmalarda “köhlən atlar” daha üstün və güclü olacaq. Yeni transferlərin zamanla komandaya uyğunlaşacağına və daha effektli oyun nümayiş etdirəcəyinə əminəm. Artıq “Sabah”ın premyer-liqada çempionluq iddiası şübhə altındadı”.

“Matç göstərdi ki, hər iki komanda layiq olduğu yerdədi. Həyəcanlı epizodlar, hücumların intensivliyi, yüksək səviyyədə təşkil olunan müdafiə xətti və başqa amillər düşüncələrimin bariz sübutudu. “Sabah” performansı ilə “Qarabağ”a asanlıqla uğur qazanmayacağını göstərdi. Nəhəng komandaların qarşılaşdığı matçlara nəzər saldıqda ən az səhv edənin meydandan qalib ayrıldığını görürük. Bu oyunda da hesabın ədalətli olduğunu düşünürəm. Hər iki komandanın mübarizəsi təqdirəlayiq idi. Hansısa üstünlük haqda danışmaq hələ tezdi. Növbəti oyunlar daha gərgin olacaq. “Qarabağ”la “Sabah” qalan matçlarda xal itirməsə və yerini qorusa, bizi daha həyəcanlı matçlar gözləyir. Azərbaycan futbolunda rəqabətin artması vacibdi. Belə komandaların sayı daha çox olmalıdı, belə həyəcanlı matçları tez-tez izləməliyik”.

"Çox maraqlı, qarşılıqlı hücumlar şəraitində keçən oyun izlədik. Hər iki komandanın müdafiədə etibarlı oynadığını qeyd edərdim. Çempionatımızın belə matçlara ehtiyacı var. Bu cür oyunların olduğu yerdə inkişafdan danışmaq olar. Düşünürəm ki, "Sabah"ı daha önə çəkmək lazımdı. Murad Musayev qısa zamanda yaxşı komanda qurub. Kollektiv artıq çempionluğa iddialı olduğunu göstərir. Heyət və infrastruktur baxımından "Qarabağ"dan geri qala bilərlər, lakin qızıl medallar uğrunda yarışda müqavimət göstərəcəklər. Hər iki komanda qalib gələ bilərdi. Amma məncə, ədalətli nəticə elə heç-heçə idi".