"Əvvəla onu deyim ki, güclü rəqibə qarşı çox yaxşı, hətta müəyyən qədər üstün oyun sərgilədik. Naxçıvan təmsilçisinin heyətində yetərincə təcrübəli futbolçu yer alıb. Bizim heyətimizdə əsasən 2006-07 təvəllüdlü gənclərdi. Buna rəğmən, rəqibdən nə qorxduq, nə də komanda şəklində arxaya çəkildik. Əksinə, yaradıcı oyunumuzla rəqibə başağrı olduq. Erkən qol vurduq, rəqibi təzyiq altında saxladıq. "Araz Naxçıvan" yalnız 2-ci hissədə 7 dəqiqə ərzində təcrübəli futbolçuları sayəsində bizi məyus etdi. Rəqibin heyətində premyer-liqa təcrübəsi olanlar var. Hakimə etirazın səbəbi isə təmiz qolumuzu saymamasıydı. İbrahim Ağayarov qol vurdu, referi isə rəqib qapıçıya qarşı qayda pozuntusu qeydə aldı. Guya hücum zamanı futbolçumuz Seyxan Fərəcov qolkiperə müdaxilə edib. Epizoda baxanda isə belə olmadığını görürük. Hakimin qərarından sonra İbrahim Ağayarov əsəbindən dirəyə təpik vurduğuna, mən isə epizodla bağlı fikrimi dediyimə görə "sarı" aldıq. Yetirmələrimin çıxışından razıyam, onlara mübarizə əzmi göstərdiklərinə görə təşəkkür edirəm".

"Qaspar Panadero hələ də bizimlə məşq edir. Çalışır ki, formasını saxlasın. Amma onun meydana çıxması inandırıcı deyil. Çünki "Qarabağ"ın strategiyası maksimum gənc futbolçulara şans verməklə onların potensialını üzə çıxarmaq və əsas komandaya qazandırmaqdı. Düzdü, heyətimizdə iki-üç təcrübəli oyunçunun yer almasını istəyərik. Amma onların maksimum 25 yaşa qədər və yerli oyunçu olmasında maraqlıyıq. İştirak ərizəmizə baxsaz, görərsiz ki, oyunçularımızın əksəriyyəti 2000-ci il və daha yuxarı təvəllüdlüdü. Heyətdə yalnız bir təcrübəli futbolçu var ki, o da 1996-cı il təvəllüdlü Elvin Nəsibovdu. Bu gün Nəriman Axundzadənin, Ayhan Arazlının əsas komandaya cəlb olunmasına çox sevinirik. Digər futbolçularımızı da əsas komandaya qazandırmaqda maraqlıyıq".