“Ayaks”dan ayrılan Deyli Blind özünə yeni iş yeri tapıb. O, “Bavariya” ilə anlaşıb.

Almaniya klubunun saytının məlumatına görə, 32 yaşlı müdafiəçi ilə müddəti bu mövsümün sonuna kimi razılaşdırılan müqavilə imzalanıb. Amma yayda tərəflərin müddəti birilliyə artırmaq hüququ da nəzərdə tutulub. Niderland millisinin üzvü artıq “Bavariya” ilə Dohadakı təlim-məşq toplanışına yollanıb. Dekabrın 27-də öz istəyi ilə “Ayaks”la müqaviləsi pozulan Deyli bu mövsüm Niderland çempionatında meydana çıxdığı 13 oyunda 2 məhsuldar ötürmənin müəllifi olub. O, milli komandanın heyətində Qətərdə keçirilən dünya çempionatında 5 oyunda iştirak edib, bir qol vurub və məhsuldar ötürmə verib. Blindin yeni komandasında mundialda ağır zədə alan fransalı müdafiəçi Lukas Ernandesin yerini tutacağı gözlənilir.

“Bavariya”nın idman direktoru Hasan Salihamiciç onunla anlaşmanı belə dəyərləndirib: “Deylinin komandamıza qoşulmasına şadıq. O, həm mərkəzdə, həm də cinahda oynamağı bacaran universal müdafiəçidi. Böyük təcrübəsi ilə bizə çox köməyi dəyəcək”.

“Ayaks”ın yetirməsi olan Deyli komandanın sabiq oyunçusu Danni Blindin oğludu. O, “ağ-qırmızılar”ın sıralarında 2008-14 aralığında və 2018-ci ildən dekabradək çıxış edib. 2014-18-ci illərdə “Mançester Yunayted”də oynayan Deyli “Ayaks”da bütün turnirlərdə 333 rəsmi oyun keçirib, 13 qol vurub və 21 məhsuldar ötürmə edib. Təcrübəli futbolçu Almaniyaya gəlişini belə dəyərləndirib: “Tezliklə “Bavariya”nın formasında rəsmi oyuna çıxmaq istəyirəm. Mövsümün həlledici mərhələsinin başlamasını səbirsizliklə gözləyirəm. Bura gəlmək qərarıma titullar qazanmaq istəyimin təsiri çox olub”.