Türkiyədə hakimliklə bağlı məsələlərin və təyinatların daim gündəmdə olduğunu nəzərə alsaq, dünən bu baxımdan çox mühüm bir hadisə yaşandı.

Football-plus.az xəbər verir ki, Türkiyə Futbol Federasiyasının başqanı Mehmet Büyükekşinin dəvəti ilə superliqa klublarının prezidentləri qurumun Hasan Doğanın adını daşıyan mərkəzində toplaşdılar.

TFF-nin binasına Klublar Birliyinin sədri Əli Koç başda olmaqla bütün superliqa klublarının prezidentləri gəlmişdi. Bu da səbəbsiz deyil. Belə ki, Büyükekşi klub prezidentlərinə hakim təyinatları zamanı istifadə olunan alqoritmlərə hansı meyarların əlavə olunduğunu, bu meyarların nəyin əsasında hazırlandığını, ümumiyyətlə, bu prosesin necə reallaşdığını göstərdi. Yəni faktiki həftəsonu baş tutacaq 15-ci turun qarşılaşmalarının təyinatları klub prezidentlərinin gözü önündə həyata keçirildi! Bunu Türkiyə futbolunda bir yenilik adlandırmaq olar. Görəsən, bundan sonra uduzan klubların rəsmiləri hakimlik barədə nə deyəcəklər? Adətən, uduzan tərəf hər şeydə hakimliyi günahlandırır. Bu üzdən son dönəmlərdə hətta Türkiyə futboluna əcnəbi hakimlərin cəlb olunması məsələsi də ciddi şəkildə müzakirə edilmiş, amma qəbul olunmamışdı.

Beləliklə, kompüter hamının böyük səbirsizliklə gözlədiyi “Trabzonspor” – “Fənərbaxça” matçına Xəlil Umut Meləri təyin etdi. Cüneyt Çakır karyerasını tamamladıqdan sonra 36 yaşlı Melər hazırda faktiki Türkiyənin ən yaxşı hakimi sayılır. Melər bu mövsüm “Fənər”in cəmi 1 oyununu idarə edib və komanda həmin matçda səfərdə “Ankaragücü”nü 3:0 hesabı ilə üstələyib. Ümumilikdə “”sarı-lacivərdlilər” bu hakimin idarəçiliyi ilə 26 rəsmi oyundan 16 qələbə, 4 heç-heçə, 6 məğlubiyyətlə ayrılıblar. Bu ədalət təmsilçisi “Trabzonspor”un oyununu isə ən son ötən mövsüm kubokun yarımfinalında idarə edib. Həmin vaxt Trabzon təmsilçisi əlavə vaxta gedən matçda “Kayserispor”a 2:4 yenilərək finala çıxa bilməmişdi. Ümumilikdə qaradənizlilərin Melərin idarəçiliyi altında göstəriciləri belədi: 23 oyun, 10 qələbə, 7 heç-heçə, 6 məğlubiyyət.