"Afrikalılar komanda şəklində müdafiə olunmaq və top saxlamaqla xeyli irəlilədi. Amma kompakt müdafiəylə nə qədər uğur qazansan da, gec-tez dalana dirənirsən. Daha yüksək nəticələr üçün mütləq hücumda yaradıcılığıyla seçilən, fərdi oyunuyla rəqib müdafiəsini təzyiq altında saxlayan və yara bilən oyunçuların olmalıdı. Bunu deməklə heç də xarakter göstərən mərakeşlilərin uğurlarını kiçiltmək istəmirəm. Sadəcə, Fransa ilə oyunda aydın şəkildə gördük ki, futbolçuların fərdi ustalığı matçın taleyini həll etdi. Bəli, Mərakeş millisində top-liqalarda çıxış edən futbolçular var. Dövlətləri, xalqları üçün meydanda əzmkarlıq göstərdilər. Amma onların əksəriyyətinin beynəlxalq turnirlərdə komanda oyunu təcrübəsi İngiltərə, Fransa, Braziliya səviyyəsində deyil. Fransa - Mərakeş cütündə avropalılar oyunçuların səviyyəsi, mundial təcrübəsi sayəsində qalib gəldilər. Afrikalılar onsuz da böyük sıçrayış etməklə tarix yazdılar".