"Formula-1" üzrə Azərbaycan “Qran-pri”sinə ilk bileti kim alıb?
2023-cü il aprelin 28-30-u aralığında Bakıda "Formula-1" üzrə Azərbaycan “Qran-pri”si keçiriləcək.
“Football-plus.az” saytının məlumatına görə, bu gün bilet satışına start verilib. Bunu “Hilton” otelində baş tutan mətbuat konfransında Bakı Şəhər Halqası Əməliyyat Şirkətinin (BŞH) Satış və Kommersiya departamentinin rəhbəri Səbri Gülmalıyev bildirdi. Azarkeşlər yanvarın 15-dək davam edəcək 20 faiz erkən satış endirimindən yararlana biləcək:
"Bu il daha çox yerli azarkeşin yarış həyəcanını yaşaması və Dənizkənarı Milli Parkda əyləncələrdən zövq alması üçün erkən bilet satışı dövründə ayaqüstü biletlər 40 manatdan 120 manatadək, tribuna biletləri 160 manatdan 690 manatadək, azyaşlılar üçün biletlər isə 110 manatdan 480 manatadək olan qiymət aralığında təklif olunacaq. Avtoidman həvəskarlarını bu kampaniyadan faydalanmağa dəvət edirik".
Biletlər "28 Mall", "Gənclik Mall", Heydər Əliyev Sarayı, Kiosk 1 (Azərbaycan kinoteatrı), Kiosk 2 (Nizami küçəsi), ASAN 1, ASAN 2, ASAN 3, ASAN 4 və ASAN Sumqayıtda satılacaq.
Bakıdakı yarışın mətbuat katibi Turab Teymurov isə bunları söylədi:
“Azərbaycan “Qran-pri”si ölkəmizə çox şey qazandırır. Bu, qalib ölkə olaraq tanınmağımız üçün də önəmlidi. İlk 4 ildə 500 milyon dollardan çox qazanc əldə olunub. Budəfəki yarışı daha möhtəşəm təşkil edəcəyik. Biz artıq qalib ölkənin qalib xalqıyıq. Azərbaycan “Qran-pri”si çərçivəsində ilk dəfə sprint yarışı da təşkil olunacaq. Bu, ölkəmizə gələcək azarkeşlərin sayını daha da artıracaq. “Bakı sindromu” artıq “Formula-1”in lüğətinə daxil edilib. Ümid edirəm ki, bu ənənə növbəti il də davam edəcək. Yəni, biz yenə fərqli qalib görə bilərik.
Mətbuat konfransında ilk biletin alındığı ölkənin adı da açılandı. Belə ki, satışın başlamasından 9 dəqiqə sonra “Abşeron” tribunası üçün üç bilet İngiltərədən alınıb. Azərbaycan və Rusiyadan da bilet əldə edənlər olub.
KƏNAN HƏSƏNOV
Digər xəbərlər
