Ferstappen çəki atmalıdı
“Formula-1” üzrə dünya çempionatında mövsüm bitib, amma açıqlamaların ardı-arası kəsilmir.
“Red Bull”un rəhbəri Kristian Hornerin fikrincə, bu komandanın pilotu Maks Ferstappen qış fasiləsində çəki atmalıdı:
“Formula-1”də yarışan pilotlar da jokeylər kimidi, daim müəyyən çəkidə qalmalıdılar. Ostindəki steyk məclislərindən və Braziliyadakı takodan sonra gördük ki, Maksın qalxdığı tərəzinin əqrəbi sürətlə qalxmağa başladı. Bu üzdən düşünürəm ki, qış fasiləsində, yəni sükan arxasına qayıdacağı günə qədər bir neçə kiloqramla vidalaşmalıdı”.
Xatırladaq ki, 25 yaşlı niderlandlı son mövsümdə 454 xal toplamaqla ardıcıl 2-ci dəfə dünya çempionu olub.
Bu arada “Mersedes”in icraçı direktoru Toto Volff Mattia Binottonun “Ferrari”nin rəhbəri postundan getməsinə münasibət bildirib:
“Mattia ilə aramızda müəyyən fikir ayrılıqları olub. Bu heç kimə sirr deyil. Ancaq 2022-ci ildə münasibətlər yaxşılaşmışdı. Onun “Ferrari”də yüksək təzyiq altında olduğu həmişə aydın idi. Sən “Ferrari”də rəhbər vəzifə daşıyırsansa, yaxşı olar ki, dərhal müqaviləyə qovulacağın hal üçün əlverişli şərtlər yazdırasan. Nəticədə qaçılmaz hadisə yaşandı, hərçənd Binotto güman etdiyimdən daha artıq davam gətirdi”.
Volff Binottonun “Mersedes” komandasının bir hissəsi ola bilməsinin mümkünlüyü ilə bağlı suala obrazlı şəkildə cavab verib:
“Bu illər ərzindəki mübahisələrdə hədsiz çox qab-qacaq sındırılıb. Deməli, bu mümkünsüzdü. Bütün komandanın yerinə danışa bilmərəm. Mattia “Formula-1” dünyasından yaxşı baş çıxarır, komandalardan birində özünə rol tapa bilər. Düşünürəm ki, çoxları onun xidmətində maraqlıdı”.
Bildiyiniz kimi, Binotto noyabrın sonunda “Ferrari”dəki vəzifəsindən ayrılıb. Şirkətin rəhbəri Con Elkanın ona güvənməməsi istefanın əsas səbəbi kimi göstərilir.
Digər xəbərlər
