“Ağsu 06”nın rəsmisi: “Kiminsə acığına yox, futbol oynamaq və doğma şəhərimizi təmsil etmək üçün klub yaratmışıq”
Qəzetimizin ötən sayında Region Liqasında çıxış edən "Ağsu Siti"nin prezidenti Rəmzi Eminli komandanın, demək olar ki, dağıldığını açıqladı.
Səbəb kimi də 4 il fəaliyyət göstərən kluba Ağsu şəhər İcra Hakimiyyəti tərəfndən dəstək göstərilmədiyini vurğuladı. Onun söylədiklərindən bəzi hissələri bir daha yada salaq:
“Maliyyə problemimiz var. 4 ildən çoxdu ki, bu məsələ bizi sıxır. Öz gücüm, vəsaitim hesabına, dost-tanışla birgə komandanı idarə edirdik. Dəridən-qabıqdan çıxdıq. Var gücümüzlə çalışdıq ki, “Ağsu Siti” ayaqda qalsın. Düşünürəm ki, ideal klub yaratmışıq. Heç vaxt başdansovdu iş görmək istəməmişəm. Elə olsaydı, kimə gəldi uduzardıq və ayaqüstə qalardıq. İstəmişik ki, Ağsunun adı ucalsın. Amma bu gün təkbaşına nəsə edə bilmirəm. Klubu 4 ildi yaratmışam. Bu müddət ərzində Ağsuda üç icra hakimi dəyişib. Həmişə onlara xahiş-minnət etmişəm. Yalvarmışam ki, gəlin, komandanın oyununu izləyin, futbolçulara dəstək olun. Heç olmasa, avtobus və yemək xərcini qarşılayın. Bunları etmədilər. Hətta mənim acığıma “Ağsu 06” adlı komanda yaratdılar. Məqsədləri də bəllidi. Çünki onlar “Ağsu Siti”ni məhv etmək istəyirdilər. Elə də oldu. Necə olur ki, “Ağsu 06” şəhər stadionunda oynaya bilir, amma biz yox? Həmin komanda orda məşq edir, amma biz yox? 99 faiz fəaliyyətimizi dayandıracağıq. Ağsu Gənclər və İdman İdarəsinin rəisi mənimlə prinsip aparır. Burda başqa heç nə yoxdu”.
Football-plus.az olaraq bütün bunları nəzərə alaraq "Ağsu 06"nın icraçı direktoru və məşqçisi Rəşad Kərimov ilə əlaqə saxladıq:
"Əvvəla onu deyim ki, Rəmzi Eminliylə heç bir qərəzim, düşmənçiliyim yoxdu. Ümumiyyətlə, kiminsə acığına necə klub yaratmaq olar? Bu nə söz, necə yanaşmadı? İlk dəfə belə şey eşidirəm. Acığa klub yaradılırsa, o zaman Rəmzi bəyə sual olunmalıdı ki, 1-ci divizionda Ağsu şəhərini təmsil edən eyniadlı komanda var idi, nə üçün "Ağsu Siti"ni yaratdı? Elə həmin komandaya dəstək ola bilməzdi? Kiminsə acığına yox, futbol oynamaq və doğma şəhərimizi təmsil etmək üçün klub yaratmışıq. "Ağsu Siti"nin prezidenti bizi zəif çıxış etməkdə, məğlub olmaqda qınayır və gələcəyi olmayan komanda kimi təqdim edir. Region Liqası yeni start götürüb, cəmi 3 tur oynamışıq. Qarşıda hələ çox oyun var. Yəni indidən çıxışımıza kiminsə qəti qiymət verməsi xoş hal deyil. Həmin məntiqlə gərək dünya çempionatında Argentinanı Səudiyyə Ərəbistanına uduzmasına görə aşağılayaq, komanda dağılsın. Odu ki, kimin uğurlu və ya uğursuz çıxış etdiyi mövsümün sonunda bilinəcək. Rəmzi bəy qeyd edir ki, komandamıza hədsiz imkanlar yaradılır. Görəsən, nəyi nəzərdə tutur? Hamı kimi, bizi də 2 dəst forma, toplarla AFFA təmin edib, yol xərcini də ödəyir. Həftədə iki dəfə məşq keçir, oyundan da 1 gün əvvəl toplaşıb hazırlığı tamamlamaqla ya səfər, ya da ev matçına çıxırıq. Premyer-liqada çıxış etmirik ki, güclü dəstək alaq. Ev oyunlarını keçirdiyimiz şəhər stadionunda "Ağsu Siti" də oynayır. Elə "Füzuli"yə qarşı matçı da orda keçiriblər. Necə deyə bilər ki, stadionda oynamağa şərait yaratmırlar? Bir daha deyirəm, bizim məqsədimiz futbol oynamaq, Ağsuda futbolun inkişafına təkan verməkdi. Heç kimin acığına da klub yaratmamışıq".
ABDULLA İSMAYILOĞLU
Digər xəbərlər
