Dünən səhər saatlarında Fransadan üzücü xəbər gəldi.

Football-plus.az xəbər verir ki, ölkənin tanınmış hakimlərindən olan Yohan Hamel insult keçirərək dünyasını dəyişib. Hadisə o, məşqdə olarkən baş verib. Qəfildən özünü pis hiss edən ədalət təmsilçisi xəstəxanaya çatdırılsa da, onun həyatını xilas etmək mümkün olmayıb.

Qeyd edək ki, 42 yaşlı Yohan Hamel Fransada sevilən təcrübəli hakimlərdən biri idi. 2011-ci ildən peşəkar hakim kimi fəaliyyət göstərən Hamel 2016-dan etibarən Liqa-1-in oyunlarına təyinat alırdı. Bu mövsüm elitada 8 oyun idarə edən Hamel ən son noyabrın 6-da ''Lill'' ilə ''Renn''in duelində fit sahibi olmuşdu. Son turda isə o, PSJ-nin evdə ''Oser''i 5:0 hesabı ilə darmadağın etdiyi qarşılaşmada 4-cü hakim funksiyasını icra etmişdi. Liqa-1-də 136, Liqa-2-də 85 oyun olmaqla Hamel yüksək səviyyədə karyerası boyu 300-dən çox oyun idarə etmişdi. Son 3 ildə avrokuboklara da təyinat alan Hamel ən son ÇL-in qrup mərhələsinda oynanılan ''Real'' – ''Seltik'' matçında (5:1) 4-cü hakim vəzifəsini yerinə yetirmişdi. Beynəlxalq qarşılaşmalara isə o, ötən ildən etibarən təyinat almağa başlamışdı. Bu faciəvi hadisədən sonra Fransa klubları və yerli federasiya başsağlığı mesajları yayınladılar.