Tanınmış rumıniyalı FİFA referisi Ovidiu Hatseqan infarkt keçirib.

Bu xəbəri Rumıniyanın ''Prosport'' nəşri yayıb. Son ayda xüsusi olaraq dəvət aldığı Səudiyyə Ərəbistanında bir neçə görüş idarə etdikdən sonra vətəninə qayıdan Hatseqan qarşıdakı avrokubok oyunlarına hazırlaşırdı. Məşq etdiyi vaxt ürəyində daha öncə olmayan ağrılar hiss edən ədalət təmsilçisi həm də həkim olduğu üçün dərhal vəziyyətin ciddiliyini anladı. O, infarktın simptomlarını hiss edən kimi maşınına əyləşərək xəstəxanaya yollandı. Timişoaradakı xəstəxanada təcili əməliyyat olunan Hatseqanın ürək damarlarından biri tutulduğu üçün ora stend taxılıb. Hazırda hakimin vəziyyətinin normal olduğu deyilir. Hatseqan bu mövsüm ÇL-də 7, AL-də isə 2 oyun idarə etdiyini bildirək.