Bu yay ''Fənərbaxça''dan ''Napoli''yə keçən və göstərdiyi mükəmməl performansla diqqət çəkən Kim Min Çje soyğunçuların qurbanı olub.

Daha doğrusu, oğrular onun həyat yoldaşına ziyan vurublar. İtaliya mətbuatının yazdığına görə, koreyalı müdafiəçinin həyat yoldaşı cümə günü maşınını evlərinin yanındakı ərazidə parkinq etdikdən sonra evinə yollanıb. Amma bir neçə saat sonra maşın oğurlanıb. Məsələ ilə bağlı araşdırma aparılır.

Qeyd edək ki, İtaliya Futbolçular Birliyi tərəfindən oktyabrda A seriyasının ən yaxşı oyunçusu seçilən Kim son günlərdə bu cür hadisə ilə üzləşən ''Napoli''nin ikinci futbolçusudu. Noyabrın 3-də səhər saatlarında Xviça Kvaratsxeliya da polisə müraciət edərək maşınının oğurlandığını bildirmişdi. Polislərin keçirdiyi əməliyyat bəhrəsini vermiş və maşın 1 gün sonra tapılaraq gürcü futbolçuya geri qaytarılmışdı.