Serxio Aqueronun “Mançester Siti”nin heyətində “Kuinz Park Reyncers”lə matçda geydiyi çempionluq forması hərraca çıxarılacaq.

Football-plus.az xəbər verir ki, Aquero həmin formanı 2012-ci il mayın 13-də keçirilən oyunda geyib. 34 yaşlı sabiq hücumçu 90+3-cü dəqiqədə qol vurmuş və “Siti” 3:2 hesabıyla qalib gələrək 44 ildən sonra ilk dəfə İngiltərə çempionu olmuşdu. Serxionun çempionluq qolunu vurduğu oyunda daşıdığı futbolka “Hansons Auksoniers” tərəfindən hərraca çıxarılacaq. Hərrac noyabrın 3-də Derbişirdə keçiriləcək. Yayılan məlumata görə, hərrac bu ilin mayında keçirilməliydi, lakin daha sonra qeyri-müəyyən səbəbdən təxirə salınıb. Həmin forma hazırda Böyük Britaniya Milli Forma Kolleksiyasındadı. Bu məkanın sahibi Nevill Evansın dediyinə görə, futbolkanın satışından əldə olunan vəsait xeyriyyə təşkilatlarına veriləcək.

BBC-nin yaydığı məlumatda Aqueronun formasının ən azı 20 min funt sterlinqə satılacağı bildirilir. Qeyd edək ki, “16” nömrəli idman geyimi “Kuinz Park Reyncers”lə matçdan sonra olduğu kimi qalıb - yuyulmayıb, üzərində şampan ləkələri var.

Aquero MS-də 2011-21-ci illərdə oynayıb. O, 2021-ci ilin yayında “Barselona”ya keçib. Səhhətindəki ciddi problemə görə İspaniya klubundan ayrılıb və bu il karyerasını başa vurub.