Misli premyer-liqasında 11-ci turun son oyun gününə start verilib.

"Səbail" "Şamaxı" ilə heç-heçə edib - 0:0. Matçdan sonra meydan sahiblərinin çalışdırıcısı Mahmud Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Komandanın stabil oyun göstərməsinə nə mane olur?
- Deməzdim ki, qeyri-stabil oynayırıq. Üç oyunda qırmızı vərəqə almışıq. Bu da oyunumuza təsir edib. Uşaqlar bacardığı qədər oynayır. Ola bilər ki, futbolçularımızda stabillik yoxdu. Bir oyun yaxşı oynayırlar, digər oyun fərqli olur. Ona görə də tez-tez heyətdə dəyişiklik edirik. Ümumilikdə komanda şəklində pis deyilik. Xal ehtiyatımız az olsa da, fərdi şəkildə stabil deyilik.

- Tural Bayramlı cəzalandırılacaq?
- Olacaq. Çünki Bayramlı "Zirə" ilə oyunda da qırmızı vərəqə ilə cəzalanmışdı. Ona pul cəzası kəsmişdik. Bu dəfə daha sərt olacaq. Bir oyunçu iki dəfə meydana çıxır və hər ikisində də qırmızı vərəqə alırsa, bunun cəzası sərt olmalıdı. Bəlkə də həmin vəziyyətdə sarı vərəqə ilə də kifayətlənmək mümkün idi. Hər halda, qırmızı vərəqə ilə cəzalandırıldı. Klub tərəfindən cəzası olacaq.

- Oyunun böyük hissəsini azlıqda keçirdiyinizi nəzərə alsaq, bir xalı aktivinizə yazmaq olar?
- Biz udmaq istəyirdik. 10 nəfərlə qalanda da, fasilədə dedim ki, hücum etməli, qol vurmalıyıq, müdafiədə oturmamalıyıq. Əfsuslar olsun ki, qol vura bilmədik. Bir xal qazandıq, yoxsa iki xal qazandıq, bunu demək çətindi. Rəqibin də heyətində yaxşı futbolçular var idi. Onlar da qələbə istəyirdi. Biz daha çox istəyirdik.

- Ağabala Ramazanovun yoxluğu zədə ilə bağlıdı?
- Bəli. "Turan Tovuz"la səfər oyununda zədələnmişdi və hələ də sağalmayıb. Çalışacağıq ki, "Kəpəz"lə oyunda meydanda olsun.

- Son dəqiqələrdə əks-hücuma çıxa bilərdiz, amma yan-xətt hakimi autdan ofsayd qeydə aldı. Bu, sizin üçün təəccüblü gəldi?
- Təəccüblü gəldi. Ola bilər ki, qayda dəyişib, bizim xəbərimiz yoxdu. İlk dəfədi görürəm ki, bu səviyyədə autdan ofsayd verirlər. Mənim üçün təəccüblü və acınacaqlıdı. Ki, autdan ofsayd qeydə alınır. Çox danışmaq olar.

- Özündən soruşduz?
- Xeyr, soruşmadım. Hakimlərə yaxınlaşa bilmirik. Dördüncü hakimlə mübahisəli epizodları danışıram. Amma o, meydanın mərkəzində deyil. Soruşmadım, buna ehtiyac da yoxdu. Hər şey məlum idi.

- Sizcə, baş hakim belə anda məsuliyyəti öz üzərinə götürməlidi?
- Məncə, götürmək olardı. Ola bilər ki, yan xətt hakimi səhv edir. Amma mərkəz hakimi məsuliyyəti üzərinə götürə bilərdi. İnqilab illərdi ki, hakimlik edir.