Joze Alesio Da Silvanın çalışdırdığı futzal üzrə milli oktyabrın 7-də DÇ-2024-ün əsas mərhələsi çərçivəsində Bakıda Polşa ilə üz-üzə gələcək.

Polşa ilə oyun ərəfəsində yığma ötən ay Qazaxıstanla iki yoxlama matçı keçirmiş bə hər ikisində məğlub olmuşdu. Odu ki, oktyabrın 7-də baş tutacaq matçın Alesionun yetirmələri üçün asan keçəcəyini düşünmək olmaz.

Bu arada isə yığmanın baş məşqçisi ilə komandanın kapitanı Rövşən Hüseynli arasında problem yaşandığı barədə “Football-plus.az” saytına məlumat daxil olub. Etibarlı mənbədən əldə etdiyimiz məlumata görə, braziliyalı mütəxəssis həm yığmanın, həm də “Araz-Naxçıvan”nın kapitanının “qələmini qırıb”. Bu üzdən Rövşən son vaxtlar nə ölkənin əsas komandasında, nə də Naxçıvan təmsilçisində meydana çıxır. Mənbəmizin sözlərinə inansaq, Hüseynlinin kənarda qalmasına səbəb baş məşqçinin avqustda “Araz-Naxçıvan”a dəvət etdiyi braziliyalı olub. Belə ki, kapitan komandanın yeni üzvünə klubdaxilində nizam-intizama əməl etməli, hamı kimi onun da ümumi qaydalar çərçivəsində lazımi qaydalara riayət etməli olduğunu bildirib. Braziliyalı futzalçı isə həmyerlisi olan baş məşqçiyə yaxınlaşaraq kapitandan şikayət edib. Bunu eşidən Alesio kapitanı cəzalandırmaq fikrinə düşüb. Və həmin gündən Hüseynlinin adı “qara siyahı”ya düşüb. Yığmanı və “Araz Naxçıvan”nı isə bu ay taleyüklü oyunlar gözləyir.

RƏŞAD