"Olimpiakos"un daha bir futbolçusu Afinada "Qarabağ"a qarşı keçiriləcək Avropa Liqasının qrup mərhələsinin 3-cü turunun oyununu buraxacaq.

Söhbət bud əzələsindəki zədədən əziyyət çəkən Usseynu Badan gedir. Həkimlər 27 yaşlı seneqallı müdafiəçiyə ən azı 10 gün istirahət etməyi tapşırıb. Bununla da Pirey təmsilçisinin heyətində zədəli futbolçuların sayı 3-ə çatıb. Daha əvvəl müdafiəçi Panayotis Retsos və qapıçı Tomaş Vatslikin "köhlən atlar"a qarşı oynamayacağı bəlli idi. Pireylilərin yeni baş məşqçi Miçelin sərəncamında hazırda yalnız iki mərkəz müdafiəçisi var. Bunlar Pape Abu Sisse və Sokratis Papastatopulosdu. Həmçinin dayaq yarımmüdafiəçisi Yann Mvilanın da müdafiəyə çəkilməsi istisna olunmur.

Bu arada Yunanıstan klubu qapıçı transfer edib. Pirey təmsilçisi PAOK-un 33 yaşlı sabiq qolkiperi Aleksandros Pasxalakisi heyətinə qatıb. Təcrübəli qapıçı Çexiya millisindən zədəli qayıdan Vatslikin yerinə alınıb. Azad agent kimi heyətə cəlb olunan qolkiperin adı tezliklə iştirak ərizəsinə salınacaq. Çünki qaydalara görə, komandanın heyətində ikidən az qapıçı varsa, mövsüm ərzində yeni “çərçivə qoruyucusu” sifariş edilə bilər.

UEFA isə “Olimpiakos”u cəzalandrııb. Yunanıstan çempionu Avropa Liqasının 2-ci turunda “Frayburq”la (0:3) ev matçında azarkeşlərin davranışına görə ziyana düşüb. Klub 58 min avro cərimələnib. Həmçinin “Qarabağ”la qarşılaşmada şimal tribunası qismən bağlı olacaq. Buna səbəb azarkeşlərin pirotexniki vasitələrdən yararlanmasıdı.

Qeyd edək ki, oktyabrın 6-da "Georgios Karaiskakis" stadionunda keçiriləcək "Olimpiakos" - "Qarabağ" oyunu Bakı vaxtı ilə saat 23.00-da başlayacaq.