Dünən "Bakcell Arena"da əvvəlcə "Neftçi"nin, sonra isə “Rapid”in baş məşqçisi mətbuat konfransı keçirildi.

Tədbirdə Vyana klubunun mətbuat katibi Mario Römer də iştirak edirdi. "Football-plus.az" saytı olaraq onun ölkəmizlə bağlı fikirlərini öyrəndik.

- Azərbaycan və Bakı ilə bağlı fikirləriniz maraqlıdı...
- İlk dəfədi Azərbaycandayam. Buna baxmayaraq, yenidən gəlmək istəyərəm. Azərbaycan çox maraqlı ölkədi. Paytaxt Bakı isə çox gözəl şəhərdi. Bakı sakinləri olduqca qonaqpərvər və istiqanlıdı. Onlar əcnəbilərə, turistlərə çox kömək edirlər.

- Vyana Avropada zəngin tarixi, muzeyləri ilə seçilir. Bakı ilə Vyana arasında oxşarlıq var?
- Çox çətindi müqayisə etmək. Çünki Avstriya ilə Azərbaycan çox fərqli mədəniyyətlərə, tarixə sahib ölkələrdi. Buna rəğmən, Bakıda “göydələnlər”, gözəl evlər və maraqlı gəzməli yerlər var. Bu yöndə Vyana ilə bir az oxşarlıq var.

- Azərbaycan futbolu deyəndə ağlınıza ilk gələn nədi?
- Avropada, o cümlədən də Avstriyada Azərbaycan adı çəkiləndə ağıla ilk gələn "Qarabağ" və "Neftçi" klublarıdı. Hər iki komandalarınız populyardı. Beynəlxalq yarışlarda çıxışlarını izləmişəm. Məndə xoş təəssürat oyadıb

- Yenidən Azərbaycan gəlmək istədiyinizi dediz. Yenə futbol izləməyə, yoxsa gəzməyə?
- Arzu edirəm ki, nə vaxtsa yenidən Azərbaycana gələcəm. Amma "Rapid"in mətbuat katibi kimi 1-2 günlük yox, uzun müddətə. Ölkənizi gəzib-dolaşıb, daha yaxından tanımaq istəyirəm.

ABDULLA İSMAYILOĞLU