İstanbul nəhəngləriylə yanaşı, digər klublar da maraqlı transfer xəbərləri ilə gündəmə gəlməkdə davam edir.

Debütant ''Ankaragücü''nün Xese Rodriges və Federiko Makeda kimi tanınmış oyunçuları transfer etməsinin ardından indi də ''Konyaspor'' dünyaca ünlü bir futbolçunu Türkiyəyə gətirməyə hazırlaşır. Söhbət ''Milan'', ''Çelsi'', ''Vilyarreal'' kimi klublarda top qovmuş Aleşandro Patodan gedir.

Karyerasının əvvəllərində fırtına kimi əsən və gələcəyin önəmli oyunçularından olacağı gözlənilən Pato sonradan ümidləri doğrulda bilmədi. 2013-də ''Milan''dan ayrılandan sonra onun karyerasında eniş başladı. 2 il Çində və 2 il vətənində - ''San Paulu''da top qovduqdan sonra Pato ötən il ABŞ-a yollandı.

32 yaşlı futbolçu ''Orlando Siti''də keçirdiyi 20 qarşılaşmada 4 qol, 3 məhsuldar ötürmə ilə fərqlənib. Onun bu klubla müqavilə müddətinin bitməsinə 5 ay qalıb. Deyilənə görə, ''Konyaspor'' başqanı Fatih Özgökçən fanatları tribunaya cəlb edə biləcək bir ulduz transfer etmək istəyir. ''Ağ-yaşıllar'' iyulun 13-dən bu transferi bitirməyə çalışırlar. Məlum olub ki, Pato özü də Türkiyədə oynamağın əleyhinə deyil. İtaliya mətbuatının iddiasına görə, danışıqlar uğurla irəliləsə də, hələ ki razılıq əldə olunmayıb. ''Konyaspor''da əvvəlki illərdə də Aleksandr Qleb, Samuel Eto'O kimi tanınmış futbolçular top qovub. Qeyd edək ki, ötən mövsümü 3-cü pillədə başa vuran Konya təmsilçisi yeni mövsümdə Türkiyəni avrokuboklarda təmsil edəcək 5 klubdan biridi. İlhan Palutun çalışdırdığı kollektiv bu həftə Konfrans Liqasının 2-ci təsnifat mərhələsi çərçivəsində Belarus təmsilçisi BATE ilə qarşılaşacaq. UEFA-nın qərarı ilə hər iki görüş Konyada keçiriləcək. İyulun 21-də baş tutacaq oyunda nominal meydan sahibi BATE sayılacaq və qarşılaşma boş tribunalarda önündə oynanılacaq.