Bu yay “Tottenhem” dayanmaq bilmir: London klubu İvan Perişiçlə İv Bissumanın ardından “Everton”un hücumçusu Rişarlisonla da müqavilə bağladı. Antonio Kontenin növbəti transfer hədəfi “Barselona”nın müdafiəçisi Kleman Lanqledi.

Rişarlison “mahmızlar” üçün ən ambisiyalı transferdi. 25 yaşlı braziliyalının keçidinə 50+10 milyon funt qoyulub. Tərəflər bu transferlərlə bağlı bütün məsələləri iyunun 30-da bitirmək üçün tələsib. Xüsusən də “Everton” Rişarlisonun satışına çox ciddi ehtiyac duyurdu.

“Everton”un maliyyə durumu faciəvidi
Klub hələ martın əvvəlində Əlişir Usmanovun şirkəti USM ilə sponsorluq müqaviləsini pozdu. Məhz rusiyalı biznesmen əsas sərmayəçi idi və qərarların əksəriyyətinə imza atırdı. Baş məşqçi Frenk Lempardla danışıqları da o aparmışdı. USM “Everton”a təkcə elə gələcək stadionun ad hüququna yiyələnmək üçün 30 milyon funt ödəmişdi. Hər kəs anlayırdı ki, özbək əsilli biznesmenin dəstəyi olmadan liverpullular əziyyət çəkəcək. Belə də oldu.
“Everton” yayda titul sponsorunu – “Cazoo” şirkətini də itirdi. Onun əvəzində futbolkalarda hazırda onlayn-kazino şirkəti olan “Stake.com” loqosu görünür. Detallar açıqlanmasa sa, yeni sövdələşmə əvvəlkindən ucuzdu.

Klub İngiltərə premyer-liqasının rəhbərliyi qarşısında maliyyə hesabatı baxımından ciddi problem yaşayır. “The Athletic”in informasiyasına görə, “Everton”un son 3 ildəki borcları 265 milyon funt təşkil edib ki, bu da yolverilən həddən – 105 milyondan çox artıqdı. Klub bu üzdən futbolçularını qəpik-quruş qarşılığında buraxır və Rişarlisonla vidalaşmağa da məcbur oldu. Özü də ötən maliyyə ilinin sərhədlərinə sığmaq üçün bu transferi məhz iyunun 30-na qədər bitirmək vacib idi. İş ondadı ki, bu yay dördillik maliyyə tsikli bitir: İngiltərədə, adətən, 3 il bir tsikli təşkil edir, ancaq 2019/20 və 2020/21 mövsümləri pandemiyaya görə bir il sayılır. “Everton” son 2 ildə ciddi qənaət rejiminə keçib. İndi isə liderini cəmi 50-60 milyona satmağa məcburdu. Bu addımın nə dərəcədə işə yaradığı məlum deyil. İngiltərədə maliyyə qaydalarının pozulmasına görə cəza spektri genişdi – xəbərdarlıqdan və bonuslardan məhrum olunmaqdan tutmuş yarışlardan uzaqlaşdırmaya qədər davam edir. Hər epizoda ayrıca baxılır.

“Everton” Rişarlisondan 10-20 milyon funt qazandı

Alış zamanı futbolçunun transfer məbləği onun müqavilə müddətin bölünür. Yəni siz onu 50 milyon avroya satıbsızsa və 5 illik müqavilə bağlayıbsızsa, əməkhaqqı cədvəlinə düşən illik yük 10 milyon avro olur. Oyunçunun satışı zamanı isə bütün gəlir dərhal fiksə olunur – futbol mühasibatı belə qurulub. İndi hesablayaq. “Everton” Rişarlisonu 2018-də 5 illik müqavilə ilə 50 milyon funta (35+bonuslar) almışdı, illik yük 10 milyon idi. Beləliklə, klub braziliyalının hesabatı üçün 40 milyon funt xərcləyib, indi isə 50-60-a satır. Yəni bu əməliyyatdan 10-20 milyon avro qazandı. İndiki “Everton” hətta bu qazanca görə də sevinir. Rişarlisonun iyulun 1-nə qədər satılması o deməkdi ki, Liverpul klubu maliyyə hesabatını nisbətən qaydaya saldı, ancaq çətin bu kifayət edə.