Liverpul təmsilçiləri premyer-liqanın cari mövsümündə fərqli qrafik cızırlar.

Şəhərin eyniadlı komandası “Mançester Siti” ilə amansız çempionluq mübarizəsi aparırsa, Frenk Lempardın “Everton”u heç cür “uğursuzluq zolağından çıxa” bilmir. Növbət mövsümü çempionşipdə keçirmək təhlükəsi yetərincə realdı. Komanda aprelə “Everton” önündəki məğlubiyyətlə başladı.

Lempard 8 oyunun altısında uduzub

Təbii ki, London səfəri “Everton” üçün asan olmayacaqdı – Devid Moyesin komandası Çempionlar Liqasına vəsiqə uğrunda mübarizə aparır. İlk yarıda hesabı cərimə zərbəsini ideal yerinə yetirən “Vest Hem”in cinah müdafiəçisi Aaron Kressuell açdı. “Liverpul”un yetirməsi (Aaronu akademiyadan xaric ediblər) qolu düz “Everton” azarkeşlərinin qarşısında qeyd etdi. Komandalar 2-ci hissədə hərəyə bir qol vurdu – Meyson Holqeyt hesabı bərabərləşdirdi, ancaq Cerrod Bouen yenidən “çəkicdöyənlər”i irəli çıxardı. “Everton”un məğlubiyyətdən qurtulması mümkün olmadı. Maykl Kin 65-ci dəqiqədədə qırmızı vərəqə almaqla komandasının vəziyyətini bir qədər də çətinləşdirdi. Bu, “Everton”un oyunçularının son üç turda aldığı 3-cü qırmızı vərəqə idi.

Maraqlıdı ki, Lempard oyunun keyfiyyəti ilə bağlı heç bir problem görmür. Onun fikirləri: “Hər şey əleyhimizə cərəyan edir: qərarlar, oyun epizodları, qırmızı vərəqələr. Futbolçuları, onların xarakterini, ümumilikdə göstərdikləri oyunu ittiham edə bilmərəm. Oyunumuzda müsbət məqamlar çoxdu, irəlidə hələ 10 oyun var”.
Amma fanatlar nikbinlik üçün əsas tapa bilmir. Lempard komandaya yanvarın sonunda – Rafael Benitesin istefasından sonra gəlsə də, yaxşılığa doğru heç nə dəyişməyib. Frenkin dövründə keçirilən 8 oyundan 6-sı məğlubiyyət, 2-si qələbə (“Lids” və “Nyukasl” üzərində) ilə bitib. Üstəlik komanda ölkə kubokunda mübarizəni “Kristal Pelas”dan aldığı biabırçı məğlubiyyətdən (0:4) sonra dayandırıb.

Səfər oyunlarının statistikası daha qorxuncdu. “Everton” İngiltərənin peşəkar liqalarında 2022-də səfər qələbəsinə həsrət qalan (“Bernli” ilə dünənki oyundan əvvəl yazılıb – red.) yeganə komandadı. Mövsümün əvvəlindən bəri səfər oyunlarında mümkün 45 xaldan 6-sı qazanılıb, yeganə qələbə avqustda “Brayton” üzərində olub.

“Everton” çempionşipə yuvarlana bilərmi?

“Vest Hem”ə məğlubiyyətdən sonra Liverpul komandası 17-ci yerdə qaldı və düşmə zonasından cəmi 3 xal irəlidədi.
15. Nyukasl 30 7 10 13 33-54 31
16. Lids 31 7 9 15 35-68 30
17. Everton 28 7 4 17 30-49 25
18. Uotford 30 6 4 20 29-57 22
19. Bernli 28 3 12 13 22-40 21
20. Norviç 30 4 6 20 18-63 18

İlk baxışdan vəziyyət faciəvi görünmür – “Everton”un ehtiyatda bir neçə oyunu qalıb. Çempionşipə yuvarlanmaq təhlükəsi ilə üzləşən komandaların da sayı çoxdu. “Norviç”i yalnız möcüzə xilas edə bilərsə, “Lids”, “Uotford”, “Bernli” və “Nyukasl” azarkeşləri də indi səksəkə içində yatıb-dururlar. Lempard komandasının oyununda gördüyü pozitiv məqamlara arxalanıb, qalan 10 oyunda vəziyyəti dəyişəcəyinə inanır. Amma “Everton”un təqvimi heç də yaxşı deyil.

19-cu turdan təxirə salınan oyun, 6 aprel: Bernli - Everton
32-ci tur, 9 aprel: Everton – Mançester Yunayted
33-cü tur, 17 aprel: Everton – Kristal Pelas
18-ci turdan təxirə salınan oyun, 20 aprel: Everton – Lester
34-cü tur, 24 aprel: Liverpul – Everton
35-ci tur, 1 may: Everton – Çelsi
36-cı tur, 7 may: Lester – Everton
30-cu turdan təxirə salınan oyun, 11 may: Uotford - Everton
37-ci tur, 15 may: Everton – Brentford
38-ci tur, 22 may: Arsenal – Everton

Gördüyünüz kimi, qalan 10 oyundan dördü “böyük altılıq” komandaların qarşı olacaq. Tədricən özünə gələn “Lester”lə də iki oyun var. Üstəlik “Everton” birbaşa rəqibləri – “Bernli” və “Uotford” ilə səfərdə oynayacaq. Cari mövsümdə səfərdə hansı nəticələrin qeydə alındığı yada salsaq, heç-heçəyə belə təminat vermək çətindi. Premyer-liqa oyunlarının şərhi üzrə ixtisaslaşanlar belə hesab edirlər ki, komanda premyer-liqada yerini qorumaq üçün 40 xal toplamalıdı. “Everton”un hələ 25 xalı var. Bu isə o deməkdi ki, komanda qalan 10 oyundan 5-də qələbə qazanmalıdı (və ya 3 qələbə, 6 heç-heçə də bəs edir). Yox, 40 xal toplamaq mümkün olmasa, ümid qalır başqa komandaların daha pis çıxış edəcəyinə.

Klubun sponorlarla bağlı problemi var

Elita ilə vidalaşmaq “Everton” üçün fəlakət olardı. İş ondadı ki, klubun maliyyə durumu da çətinləşib.

• Klub martın əvvəlində Əlişir Usmanovun şirkəti USM ilə sponsorluq müqaviləsini pozdu. Klubun rəsmi sahibi Fərhad Moşiri yox, məhz özbək əsilli rusiyalı biznesmen əsas səhmdar idi və qərarlar verirdi. Lempardla danışıqları məhz Usmanov aparmışdı. Bundan başqa, USM gələcək stadionun ad hüququna yiyələnmək üçün hərracın iştirakçıları sirasında olmaq niyyəti ilə “Everton”a 30 milyon funt ödəmişdi. Usmanov kluba dəstək verməsə, çətin olacaq.

• Klubun İngiltərə “maliyyə feyr-pleyi” ilə bağlı problemi var. “The Athletic”in informasıyasına inansaq, “Everton”un son üç il üçün borcu 265 milyon funtdu ki, bu da yol verilən həddən (105 milyon) çox yüksək məbləğdi. Bu üzdən yay transferlərinə cəmi 1,7 milyon funt xərclənib. Qış transferlərinin pulunu isə Lüka Dini “Aston Villa”ya satmaqla ödəyiblər.

• Premyer-liqadan getmək mükafat məbləğlərinin və teleyayın hüququnun satışından gələn paranın azalması deməkdi. Oyun günü gəlirləri o qədər azalmayacaq – çempionşipdə dolu tribunalar önündə oynayan “Vest Hem” və “Nyukasl” nümunəsi var.

Sponsor ödənişləri kəskin şəkildə azalacaq. Yayda “Everton”un titul sponsoru – “Cazoo” şirkəti ilə müqaviləsinin müddəti bitir. Klub fəal şəkilfə yeni sponsor axtarışına girişib, ancaq premyer-liqada olmayacaqsansa, yüksək məbləğə iddia etmək çətindi. Hazırda “USM Finch Farm” adlanan məşq bazası ilə bağlı da problem var.

• Başqa vacib aspekt maaşlardı. “Everton” maaş cədvəlinin həcminə görə premyer-liqanın 7-ci komandasıdı. Əksər oyunçuların müqaviləsində komanda elitadan gedəcəyi təqdirdə mükafatların azaldılacağı ilə bağlı bənd var. “Norviç” tipli komandalarda belə bənd maaş cədvəlinin avtomatik 3-4 dəfə kiçilməsi deməkdi. “Everton”da isə heç də hamının müqaviləsində bu bənd yoxdu. Baha futbolçuları çempionşipdə saxlamaq büdcəyə böyük zərbədi. Belədə az pul qarşılığında satmalı olacaqlar. Ən qiymətli aktivlərin, məsələn, Rişarlisonun da qiyməti aşağı düşəcək. Onsuz da maliyyə problemləri üzündən adı çəkilən futbolçunu saxlamaq çətindi.

Klubun yeni tarixində gələcəyi müəyyənləşdirmək baxımından ən həlledici an yetişib. “Everton” premyer-liqadan gedərsə, “Sandelend”in acı taleyini təkrarlaması tam realdı. Pulla yaxşı davranmayan bu komanda indi çempionşipdən də aşağı dəstədə yarışır...