Artıq bir çox premyer-liqa komandaları yeni mövsüm üçün hazırlıq planını açıqlasa da, bölgə təmsilçisi hələ də sədr seçimini gözləyir. Qeyri-rəsmi mənbədən aldığımız məlumata görə, iyunun 9-u klubda Müşahidə Şurasının iclası keçirilməliydi. Bununla da klubun qarşıdakı planları ilə yanaşı, yeni rəhbər də seşiləcəkdi.
Məlumatı dəqiqləşdirmək üçün klubun baş meneceri Eldəniz Yusubovla əlaqə saxladıq. İlk baxışdan sualımıza cavab verməyəcəyi aydın şəkildə hiss olunurdu. Elə də oldu. “Heç nədən xəbərim yoxdu” deməklə kifayətləndi. Amma çox da üzülmədik. Çünki telefonu üzümüzə söndürəndə “sağ ol” deməyi əsirgəmədi.
Klubun mətbuat katibi Səbuhi Məmmədovdan da ciddi məlumat ala bilməsək də, bir-iki kəlmə qopara bildik:
“Müşahidə Şurasının iclası hələ keçirilməyib. Sonrakı addımlar, iclasın nə vaxt olacağı ilə bağlı da məlumatımız yoxdu. Mən də vəziyyəti şərh edə bilmirəm, hamı kimi gözləyirəm. Komandanın təlim-məşq toplanışı, yeni futbolçuların cəlb olunması, hazırlıq prosesi kimi məsələlər açıq qalıb. Bununla bağlı ancaq yeni rəhbər müəyyənləşəndən sonra qərar veriləcək”.
Yəqin bu qeyri-müəyyənlik çox davam etməyəcək. Artıq yay “transfer pəncərəsi” də açılıb. Klub yeni mövsüm üçün planlarını qurmalıdı. Odu ki, yaxın günlərdə “Şamaxı”nın yeni rəhbərliyinin adına aydınlıq gələcəyinə ümid edirik.
ŞAİR ABDULLA
