Millimiz bu gün Millətlər Liqasının C divizionunun 3-cü qrupunun 3-cü oyununda Slovakiya ilə üz-üzə gələcək.

“Dalğa Arena”da keçiriləcək qarşılaşmada hər birimiz yığmanın qələbə qazanmasına ümid edəcəyik. Bildiyiniz kimi, komanda son qələbəyə ötən il iyunun 2-də sevinib. Millətlər Liqasında B divizionuna vəsiqə qazanmaq istəyiriksə, mütləq Slovakiyanı məğlub etməliyik. İlk iki qarşılaşamadan fərqli bu görüş doğma meydanda, azarkeşlərimizin önündə baş tutacaq. Səfərdə keçirdiyimiz 2 matçdan 1 xalla qayıda bildik. Qazaxıstan və Serbiyada olan vəziyyətdən xəbərdar deyilik. Bəlkə millimiz bu ölkələrdə yaxşı qarşılanmayıb deyə, futbolçuların motivasiyasızlığı hiss olunurdu. Səfər təəssüratını öyrənmək və bizi maraqlandıran başqa sullara cavab tapmaq üçün AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdulla ilə danışdıq.

- Qazaxıstan səfərindən başlayaq. Necə keçdi? Şəhərin ab-havası necə idi? Sizə necə münasibət göstərildi? Nədən razı, nədən narazı qaldız?
- Qazaxıstan səfərində komandanın məğlubiyyətindən başqa narazı qala biləcəyimiz məqam yoxdu. Səfərin təşkili ilə bağlı problemlə üzləşmədik. Bakı ilə saat fərqi bir az narahatlıq yaradırdı. Bu isə çıxış yolu olmayan çətinlikdi.

- Belarusla matç Serbiyada neytral meydanda baş tutdu. Bu səfərlə bağlı nələr demək istəyirsiz?
- Saat fərqi ilə bağlı narahatlıq Serbiyada özünü daha qabarıq şəkildə göstərdi. İstər Qazaxıstanda, istərsə də Serbiyada bizə münasibətdə narahatlıq və narazılıq doğuran hansısa məsələ olmadı.

- Slovakiya millisinin üzvləri Bakıda harda məskunlaşacaq?
- Həm Slovakiya, həm də Belarus millisinin üzvləri “Bilgəh Beach” oteldə yerləşdiriləcək.

- Bilet satışında son durum necədi? Yığmanın oyununa maraq var?
- Hazırda 2 minə yaxın bilet satılıb.

- Maksim Medvedevin vəziyyəti necədi? Slovakiya ilə matçda oynamasına əngəl ola biləcək qədər ciddi vəziyyət yoxdu?
- Maksimin vəziyyəti ilə bağlı oyundan sonra keçirilən mətbuat konfransında danışan baş məşqşi Canni de Byazi zədənin ciddi olmadığını, sadəcə, ayağında qıcolmalar başladığına görə əvəzlədiyini bildirdi. Slovakiyaya qarşı meydanda olub-olmayacağına gəlincə, bu artıq baş məşqçinin qərarından aslıdı. Amma səhhəti ilə bağlı heç bir problem yoxdu.

- Slovakiyadan nə qədər nümayəndə gələcək? Azarkeşlərin və jurnalistlərin səfəri nəzərdə tutulub?
- Nümayəndə və azarkeşlə bağlı gün ərzində məlumat olacaq. Slovakiyadan 10 jurnalistin ölkəmizə gəlib.

SƏNƏM FƏRHADOVA