Bu yay Avropa futbolunun tranfer bazarında hərəkətli anlar yaşanacaq.

Bir çox məşhur futbolçunun iş yerini dəyişəcəyi gözlənilir. Bəs belə məşhurların “10-luğ”unda kimlər var?

Qabriel Jezus
Klub: “Mançester Siti”
Dəyəri: 50 milyon avro*
Hara: “Arsenal”, “Yuventus”, “Tottenhem”
Tərəqqisi dayanan 25 yaşlı braziliyalı son mövsümdə MS-nin əsas oyunçusu sayılmırdı. Pep Qvardiola klassik mərkəz hücumçularısız ötüşdü, Jezus isə müntəzəm cinahda göründü. Erlinq Holann ilə Xulian Alvaresin transferi braziliyalının oyun vaxtını bir qədər də azaldacaq, bu üzdən yayda getməsi təbiidi. Müqavilə müddəti 1 il sonra bitəcəyindən indi “şəhərlilər” üçün onu satıb pul qazanmaq baxımından son şansdı. Jezus uğrunda mübarizədə favorit son yarım ildə Obameyanqla Lakazetti itirən, üstəlik Nketia ilə müqavilə müddətini hələ də uzatmayan “Arsenal”dı. Ancaq “Yuventus”la “Tottenhem”in də adı transfer şayiələrində hallanır.

* burda və hər yerdə transfermarkt.com saytının versiyasınə əsasən göstərilib.

Pol Poqba
Klub: azad agent
Dəyəri: 55 milyon avro
Hara: “Yuventus”, PSJ
“Mançester Yunayted” akademiyasının 29 yaşlı məzunu ilə son 10 ildə artıq ikinci dəfə vidalaşıb. Və hər şeydən belə görünür ki, Poqba son 10 ildə 2-ci dəfə azad agent qismində “Yuventus”da görünəcək. Fransalı MY-dən ayrılmamış PSJ də ona maraq göstərirdi, ancaq “Yuve” variantı həmişə prioritetdi. “Sky Sports” belə hesab edir ki, Turin klubu sövdələşməni iyunun 17-də açıqlayacaq – məhz həmin gün Poqbanın karyerası haqda çəkilən “The Pogmentary” sənədli filminin təqdimatı da olacaq.

Sadyo Mane
Klub: “Liverpul”
Dəyəri: 80 milyon avro
Hara: “Bavariya”
Qışda “Liverpul”a keçən Luis Dias dərhal Manenin sol cinahdakı yerini tutdu. Hücumun mərkəzinə çəkilən seneqallı buna görə sevinmədi. Artıq 30 yaşı olan Manenin “Liverpul”dakı perspektivi heç də əvvəlki qədər aydın görünmür. Seneqalda da Manenin klubundan narazıdılar. Forvardın həmvətənlərini onun mövqeyindən uzaqlaşdırılması qıcıqlandırır. Onlar həmçinin belə hesab edirlər ki, klubda Sadyoya Salah ilə müqayisədə daha pis yanaşırlar. Məsələn, “Liverpul” Seneqalın Afrika Millətlər Kubokundakı zəfərini və dünya çempionatına vəsiqə qazanmasını qeyd etmədi, ancaq klub əməkdaşları az qala hamılıqla hər iki məğlubiyyətdən sonra misirli ulduza təsəlli verdi. Mane artıq böyük əks-səda doğuran mətbuat konfransı da keçirib və orda tezliklə “Liverpul”dan gedəcəyinə işarə vurub. Düzdü, sonradan üzr istədi və sözlərinin zarafat olduğunu dedi. Görək bütün bunlara Maneyə əsas iddiaçı sayılan “Bavariya” necə reaksiya verəcək?

Rafinya
Klub: “Lids”
Dəyəri: 45 milyon avro
Hara: “Barselona”, “Liverpul”, “Mançester Yunayted”, “Bavariya”
“Lids” premyer-liqadan getsəydi, Rafinya yüzdəyüz klubunu dəyişəcəkdi. Braziliyalı birmənalı şəkildə “top-6” komandalarında olmayan, ancaq premyer-liqada ən yaxşı çıxış edən futbolçulardan biridi. Son mövsümdə 11 qol vuran solaxay vinger Avropanın top-klublarını bir qədər də həvəsləndirib. yayda Xavini razı salmayan Adam Traore ilə vidalaşacaq, həminin Usman Dembeleni itirmək ehtimalı yüksək olan “Barselona” onun uğrunda mübarizədə favorit sayılır. Ancaq başqa nəhənglər də Rafinya ətrafındakı durumu izləməkdədi.

Paolo Dibala
Klub: azad agent
Dəyəri: 40 milyon avro
Hara: “İnter”, “Tottenhem”, “Mançester Yunayted”, “Arsenal”, “Nyukasl”
Argentinalı forvardın “Yuventus”dan gedəcəyi çoxdan bəllidi. Turin klubuna 7 ilini verən, son mövsümdə meydana tez-tez kapitan sarğısı ilə çıxan Dibala müqavilə müddətini uzatmamağa qərar verdi. İni onun iki variantı var – ya özünü sınamaq istədiyi premyer-liqaya yollanacaq, ya da “İnter”ə. Futbolçu bugünlərdə başqa liqalarla da tanış olmaq istədiyini, ancaq İtaliyada xoşbəxt olduğunu deyib. Bu üzdən “İnter” variantı daha real görünür.

Orelyen Çuameni
Klub: “Monako”
Dəyəri: 60 milyon avro
Hara: “Real”, PSJ, “Çelsi”, “Liverpul”
Planetin ən güclü dayaq yarımmüdafiəçilərindən birinin cəmi 22 yaşı var, odu ki, bazarda onun ətrafındakı ajiotaj anlaşılandı. Fransa yığmasının oyunçusuna PSJ də iddialıdı, ancaq “Real”a keçidi daha real görünür. Madridlilər bonuslar nəzərə alınmadan “Monako”ya 80 milyon avro ödəməyə hazırdı, şəxsi müqaviləni də razılaşdırıb. Sövdələşmə baş tutsa, Çuameni yay “transfer pəncərəsi”nin ən bahalı futbolçusu ola bilər – hətta Holanna görə “Siti” bundan az pul ödəyib.

Romelu Lukaku
Klub: “Çelsi”
Dəyəri: 85 milyon avro
Hara: “İnter”, “Barselona”
Belçikalı nəhəng bir il əvvəl “İnter”dən “Çelsi”yə, demək olar ki, 100 milyon funta keçdi. Onda güman olunurdu ju, Lukaku London klubunu premyer-liqada çempionluğa iddialı kluba çevirəcək. Ancaq parlaq startdan sonra “yatdı”, əsas heyətdə yerini itirdi, qışda isə nəyə görəsə müsahibədə dedi ki, “İner” üçün darıxır (Tuxel bu üzdən onu bir müddət heyətdən kənarda qoydu). Lukaku ötən mövsüm ərzində cəmi 8 top vurdu, “Çelsi” yazda belçikalısız da yaxşı oynadı. İndi nəhəng forvardın Milana dönüşünü gözləmək tam məntiqlidi. “İnter” hələ ki danışıqlarda o qədər də fəal deyil, ancaq tələsməyə də dəyməz: iddiaçılar sırasında yalnız “Barselona”nın adı çəkilir. Kataloniyalılar da daha çox Levandovskinin transferinə fokuslanıb. “The Telegraph” yazır ki, “Çelsi” Lukakunu pul müqabilində icarəyə verməyə hazırdı – bir il üçün 20 milyon funt istəyir.

Qaret Beyl
Klub: azad agent
Dəyəri: 3 milyon avro
Hara: “Tottenhem”, “Milan”
Beyl ötən mövsümü “Real”ın ehtiyat oyunçular skamyasında keçirdi və hətta müqavilə müddətinin sonunu gözlədiyini gizlətmədi də. 32 yaşlı uelsli Çempionlar Liqasını da qazandı və indi kiməsə havayı qismət olacaq. Beyl ətrafında o qədər çox şayiə gəzmir. Hamıya aydındı ki, o artıq gənc, motivasiyalı deyil, yüksək maaş istəyəcək və daim qolf meydançasına can atacaq. Ancaq variantlar var. Məsələn, Beylin heyətində dünya ulduzu olduğu “Tottenhem”lə bağlı.

Darvin Nunyes
Klub: “Benfika”
Dəyəri: 55 milyon avro
Hara: “Liverpul”, “Mançester Yunayted”, “Nyukasl”, “Arsenal”, “Tottenhem”
22 yaşlı uruqvaylı forvard “Benfika”nın son mövsümdə parlayan ulduzudu (ÇL-də “Barselona”, “Bavariya”, “Ayaks”, “Liverpul” ilə oyunlarda fərqlənib). “Benfika” çempionatda 3-cü yeri tutsa da, Nunyes 26 qolla bombardir oldu. Yığmanın da formasını geyən futbolçunun İngiltərə klublarından birində görünməsi tam realdı – premyer-liqanın az qala yarısı ona göz dikib.

Robert Levandovski
Klub: “Bavariya”
Dəyəri: 50 milyon avro
Hara: “Barselona”
Mbappe PSJ ilə müqavilə müddətini uzatdı, Holannın MS-yə keçidi mayda gerçəkləşdi, odu ki, yayın əsas transfer macərası Levandovskinin adı ilə bağlıdı. Avqustda 34 yaşını tamamlayacaq polşalı hələ birillik müqaviləsi qalmasına rəğmən, “Bavariya”dan getməkdə israrlıdı. Özü də konkret “Barsa”ya. İnsayder Fabritsio Romano artıq üçillik müqavilənin razılaşdırıldığını bildirib, indi yalnız transfer məbləğini həll etmək qalır.

ORXAN hazırladı