Milli komandanın “qara zolaq”dan çıxa bilməməsinin 5 səbəbi – RAMİZ MƏMMƏDOV AÇIQLADI
Millimiz dünən Belarusla matçda ilk xalını qazansa da, ümumilikdə uğursuz seriyası davam edir.
Belə ki, ölkənin əsas komandası 12 oyundu qələbəyə, 4 görüşdü qola həsrətdi.
"Football-plus.az" saytı olaraq komandanın “qara zolaq”da ilişib qalması ilə bağlı mütəxəssis fikri öyrəndik.
Ramiz Məmmədov:"Yığmamızın xeyli vaxtdı uğurlu nəticə göstərə bilməməsinə hamımız məyusuq. Oyunçuların fiziki hazırlığı qaydasındadı. Kifayət qədər qaçır, hərəkət edirlər. Hazırda millinin heyətində əsas çatışmazlıq inamsızlıqdı. Sanki futbolçularda özlərinə, güclərinə, qol vurmağa, qələbəyə inam yoxdu. Qol vurmaq, qələbə üçün inam birinci şərtdi.
İkinci nöqsan ötürmələrdə dəqiqliyin olmamasıdı. Arxa ilə paslaşmada həyəcan hiss olunur, irəliyə ara ötürmələri isə ünvanına çatmır. Bunun da nəticəsində həm xətlərarası əlaqə qırılır, həm də qol vura bilmirik.
Üçüncü problem yığmada tez-tez eksperimentlərin aparılmasıdı. De Byazi hələ də oturuşmuş heyəti qura bilməyib. Anlaya bilmirəm, niyə az yoldaşlıq görüşləri keçiririk. Məhz yoldaşlıq oyunlarında aparılmalı olan eksperimentlər seçmə mərhələdə həyata keçirilir.
Dördüncü məsələ budu ki, De Byazini çoxları qınayır ki, 5-li müdafiə sisteminə sadiq qalmaqla qorxaq futbol oynayır. Əslində arxa xətdə 5 müdafiəçinin yer alması heç də müdafiə futbolu oynamaq demək deyil. Əks-hücum və ya mövqe hücümuna keçəndə 5-li müdafiəni 3-lü müdafiə əvəz edir. Müdafiədə əsər problem cinahlardan hücuma yetərincə dəstək verə bilməmələri və müdafiənin mərkəzindəki boşluqlardı. Konkret ad çəkmək istəmirəm, amma müdafiənin mərkəzində daha hazırlıqlı futbolçular yer almalıdı. Belarusla oyuna nəzər yetirsək, istər Maksim Medvedevin, istərsə də Azər Salahlının daha çox hücumlara qoşulduğunu gördük, nəinki müdafiədə dağıdıcı oyunlarını. Hər iki müdafiəçi dünən cinah yarımmüdafiəçisi kimi oynadı desək, yanılmarıq. Müdafiəçilərin bu cür yaradıcı oyunlarını başqa matçlarda da görməliyik.
Beşinci nüans azarkeşsiz tribunalar önündə oynamağımızdı. Necə deyərlər, alqışsız teatr, azarkeşsiz futbol oyunu olmaz. Tamaşaçı amili həmişə rol oynayır.
Nikbinliyimizi itirməməliyik. İnanıram ki, doğma meydanda və azarkeşlər qarşısında yığmamız daha yaxşı nəticə göstərməklə hamını sevindirəcək. Qarşıdan gələn oyunlarda milliyə uğurlar arzu edirəm".
ABDULLA İSMAYILOĞLU
