“Güclü qrupa düşmüşük. Slovakiya qrupun aşkar favoritidi. Qalan üç komanda isə qrupda ikinci yeri tutmaq üçün hər xal uğrunda döyüşəcək. Üç gündən bir oyun olacaq. Maksimum xallar toplamağa çalışacağıq”.

Bu sözləri Millətlər Liqasında Qazaxıstanla oyundan öncə keçirilən mətbuat konfransında yığmanın baş məşqçisi Canni de Byazi deyib. İtaliyalı mütəxəssisin fikirləri futbol ictimaiyyəti üçün şok effekti yaratdı. Çünki AFFA onunla yenidən müqavilə bağlayarkən qurumun rəsmiləri baş məşqçinin qarşısına Millətlər Liqasında ilk pilləni tutmaq vəzifəsinin qoyulduğunu bildirmişdilər. Əvvəlcə Elxan Məmmədov, ardından Sərxan Hacıyev bu fikri qətiyyətlə qeyd etmişdi. Bəs indi nə oldu? Niyə baş məşqçi ilə rəsmilərin sözləri üst-üstə düşmür? Cavab sadədi: De Byazi yarıtmaz və qorxaqdı. Bunu təsdiqləmək üçün bir sıra mülahizələrim var.

Əvvəlcə onun bacarıqsızlığından danışaq. İtaliyalı mütəxəssis indiyə kimi, sadəcə, Albaniya millisi ilə uğur əldə edib. Komandanı AÇ-2016-nın final mərhələsinə çıxarıb. Lakin hamıya bəllidi ki, həmin dövrdə albaniyalı futbolçular Avropanın müxtəlif klublarının heyətində çıxış edirdi. Elə “Qarabağ”ın üzvü Ansi Aqolli komandası ilə birgə Çempionlar Liqasında, Avropa Liqasında uğurlu çıxış edirdi. Həm də həmin il UEFA bayraq qalmaqalına görə serblərə texniki məğlubiyyət verdi. Bu da albanlara dəhşətli dərəcədə kömək oldu. İstənilən halda, komanda nəticə qazanmışdı. Amma bunu sırf De Byazi ilə bağlamaq olmaz. Çünki sonrakı və əvvəli işlərinin hamısı uğursuz olub. Elə bizim millidə də normal iş ortaya qoya, komandanı idarə edə bilmir. Hələ arsız-arsız yeni turnirdən öncə “liderliyə yox, ikinciliyə oynayırıq” deyir.

Normalda baş məşqçilər həm də yaxşı psixoloq olur. Onlar oyunçularına yaxşı əhval-ruhiyyə ötürür. De Byazi isə yeni turnirdən öncə deyir ki, “vallah, biz ikinciliyə oynayırıq”. Bunu eşidən Maksim niyə can qoysun meydanda? Heç olmasa, yalandan de ki, qrupdan çıxmağa çalışacağıq.

Keçən qorxaqlığa. Adam Slovakiyanı konkret gözündə şişirdib. Deyir ki, bunlarla bacarmayacağıq. Amma bu yığmanın heyətində yenilənmənin olduğundan xəbəri yoxdu. Düzdü, onlarla son görüşümüzdə 5 top buraxmışıq. Amma həmin heyət deyil. Marek Hamşikləri də yoxdu. Bakıda udub, səfərdə heç-heçə etmək haqda düşünmək olar. Yarış başlamadan “yoruldum” demək nədi?

Məsələni uzatmağın mənası yoxdu. Hər şey bəllidi. De Byazi də yığmada çalışmaq istəmir. Özü də bilir ki, qrupda nəsə edə bilməyəcək. Bu səbəbdən də belə açıqlamalar verir. Ki, mən əvvəlcədən bacarmayacağımızı demişdim. Vallah, bu italiyalının nazı ilə çox oynadıq. Təzminatı nədi, verək, çıxıb getsin. Öz məşqçilərimiz Millətlər Liqasında komandaya rəhbərlik etsin. Qalmayaq bu bacarıqsız və qorxaq məşqçinin əlində.

İLKİN SULTANLI