Parisdə keçirilən, 43 milyon 600 min avro mükafat fonduna malik “Böyük dəbilqə” seriyalı “Rolan Qarros”da ilk mərhələ arxada qaldı.

"Football-plus.az" xəbər verir ki, kişilərin turnirində Dominik Timlə Sten Vavrinkanın elə 1-ci mərhələdə dayanmasını kiçik sensasiya saymaq olar. Amma Vavrinkanı məğlub edən Korenten Mutenin irəliləməsi real görünmür. Çünki fransalı tennisçi növbəti mərhələdə “Rolan Qarros”da qələbə sayını 106-ya çatdıran Rafael Nadal ilə qarşılaşacaq.

Qadınların turnirində sensasiyaların sayı daha çoxdu. Düzdü, əsas favorit sayılan İqa Sventek 1-ci mərhələdə Lesya Surenkonu asanlıqla məğlub etdi. Ardıcıl 29-cu qələbəsini qazanan polşalı tennisçi Vinus Uilyamsın 2000-də müəyyənləşdirdiyi rekorda çatmaq üçün daha 6 oyundan qalib ayrılmalıdı. Ümidləri doğrultmayanlara gəlincə, reytinqə görə 6-cı olan Ons Jaberin Maqda Linettə uduzması hər kəsi təəccübləndirdi.

“Rolan Qarros”un ötənilki qalibi Barbora Kreyçikova da ilk mərhələdə dayandı. Düzdü, çexiyalı fevraldan bəri dirsək zədəsi üzündən oynamırdı. Bununla belə, dünyanın 97-ci raketkası Dian Parriyə uduzmasını qəbul etmək çətindi. “Böyük dəbilqə” turnirlərinin dördqat qalibi Naomi Osaka heç də favoritlər sırasında göstərilməyən Amanda Anisimovaya uduzdu. Nəhayət, dünyanın 5-ci tennisçisi Anett Kontaveytin Ayle Tomlyanoviç önündə “ağ bayraq qaldırması” da sürprizdi.