Premyer-liqanın 22-ci turunda "Şamaxı" "Neftçi"ni qəbul edib.

Qarşılaşma qonaqların 2:1 hesablı qələbəsi ilə başa çatıb. Oyundan sonra "ağ-qaralar"ın baş məşqçisi Samir Abasov qalibiyyəti belə şərh edib, jurnalistlərin suallarını cavablandırdı...

- Bu oyun bizə 90-cı illəri, 2000-lərin əvvələrini xatırlatdı. Siz həmin vaxtlarda oynamısız. Hansı hissləri keçirdiz?
- Rayonlarda belə şeyləri görmüşəm. Mənim üçün xoş oldu. Hər iki komandanın azarkeşləri möhtəşəm idi. Başa düşürəm ki, gənc oyunçularımız belə şeylərə öyrəşməyiblər. Ona görə ilk hissədə oyundan qopdular. Fasilədən sonra öz ağırlığımızı qoya bildik. Bunun nəticəsində qələbə qazandıq. Bu gün həddən artıq xoş oldu. Ümid edirəm ki, gələcək oyunlarımız da bu ab-havada keçəcək.

- Fərqli hissələr izlədik. Əvəzetmələriniz nəticə verdi. İlk "11-lik"də səhvə yol verdiyinizi düşünürsüz?
- Mert Çelikdə səhv etdik. Amma o, oynamasaydı, bəlkə də, Ömər Buludov meydana çıxacaqdı. Onun necə olacağını bilmirəm. Yusuf Lavalı oynatmaq fikrimiz yox idi. Onda zəhərlənmə baş vermişdi. Özünə gəlməyə çaklışdı. 1-2 məşq buraxıb. Yenə məcburi oynadı. Oynamama səbəbi bu idi. Hazır deyil, əziyyət çəkir. Problemi sağlamlığı ilə bağlıdır. Hesabda irəli olsaydıq, ümumiyyətlə, meydana çıxmayacaqdı. Batdığını hesab edəndə əlində olan hər şeydən istifadə edirsən.

- Fərid Yusifli özünü dayaq yarımmüdafiəçi mövqeyində özünü yaxşı hiss etmirdi..
- Daha öndə oynasa, ondan əsər-əlamət qalmaz. Sırf dağıdıcı futbolçudur. Eddi oynasaydı belə, heyətdə olacaqdı. Ondan tələblərimiz başqadır. O, ilk dəfə belə atmosferdə oynayırdı. Bu, təsir edə bilər.

- Basto küsüb gedib?
- Onunla danışmışıq. Durumundan məmnun deyildi. Oynamaq istəyirdi. Ancaq bu, yalnız dilində idi, məşqlərdə istəyini görmürdük. Qarşılıqlı şəkildə vəziyyəti bir-birimizə izah etdik. Mən dedim ki, bu burumla oynamayacaqsan. O da razı olmadığını deyib, getdi.