Millinin baş məşqçisi tarixi qərarı gözləyir - AÇIQLAMA
UEFA-nın 2023/24 mövsümündən etibarən qadınlardan ibarət komandası olmayan klubların ÇL-də iştakına qadağa qoymaqla bağlı qərarından xəbərdarsız.
Bu məsələ ilə bağlı müraciət etdiyimiz premyer-liqa klublarından yalnız üçünün — “Keşlə”, “Neftçi” və “Sumqayıt”ın qadın komandasının olduğu dəqiqləşdi. Qalanı isə qərar qəbul edilərsə, bu yöndə addım atacağını söyləyib. Sözsüz, reallaşacağı halda bu plana ən çox sevinən qadınlardan ibarət yığmanın baş məşqçisi Siyasət Əsgərov olacaq. Mütəxəssis açıqlamalarında dəfələrlə futbolçuların oyun praktikasının azlığından şikayətlənib, uğursuzluqların səbəbini klubların sayının azlığında və rəqabətin olmamasında görüb. Buna görə də mövzu ilə bağlı onun fikirlərini öyrəndik:
“İlk nöbvədə bu mövzunu qabartdığınız üçün sizə təşəkkür edirəm. Qadın futbolunun inkişafı naminə bu qərarın mediadada geniş müzakirə olunması sevindirici haldı. Yəqin ölkəmizdə növbəti ildən bununla bağlı işlərə start verilər. Başqa ölkələrdə bu proses ötən ildən başlayıb. Xüsusən də qonşularımızda. Məsələn, cari mövsümdə Türkiyənin yüksək liqasında 24 komanda iştirak edir. Qızlarımız da orda oynayır. Dörd nəhəngdən yalnız “Beşiktaş”ın qadın komandası var idi. UEFA-da bu məsələ müzakirəyə çıxarılandan sonra onlar da müvafiq addım atdılar. Hazırda hamısının qızlar komandası yüksək liqada çıxış edir. Rusiyada 2 il əvvələdək ölkənin köklü və titullu klublarından “Zenit”in qadın komandası yox idi. Ancaq dediyim kimi, bu mövzu çoxdan müzakirə olunur. Tətbiqinə də yəqin yaxın günlərdə qərar veriləcək. Ona görə də “Zenit”, sonra isə “Rubin” də qızlar komandası yaratdı. Hazırda millimizin bir neçə üzvü Rusiyada çıxış edir. Düşünürdüm ki, bizə də nə vaxtsa gəlib çatacaq. Çünki avrokuboklarda iştirak edən klublarımız var. Ümid edirəm ki, qərar qəbul ediləcək və premyer-liqa klublarının qadın komandası olacaq. Bunun işimizə təsiri də böyük olacaq. Çünki ən azı klublar tərəfindən qadın futboluna nəzarət ediləcək. Yüksək liqamızda yəqin ən azı 10 klub mübarizə aparacaq. Uşaqlar üçün də böyük stimul olacaq. Düşünün, “Neftçi” və “Qarabağ”ın komandaları yüksək liqada çıxış edəcək. Bu da qadın futbolu üçün çox böyük təkan olacaq. Yeni klubların yaranmasının bəhrəsini millimiz də görəcək, nəticələr yaxşılaşacaq, çempionatın səviyyəsi yüksələcək, klublara legionerlər dəvt olunacaq. Belədə rəqabət yaranacaq. Həmişə qabartdığım məsələ idi. İnanıram ki, gələcəkdə bizim çempionat da çox güclənəcək və futbolçular millidə daha parlaq oyun sərgiləyəcək”.
SƏNƏM FƏRHADOVA
Digər xəbərlər
