Hansı premyer-liqa klubları qadın komandası yaratmağı düşünür? - AÇIQLAMALAR
21-ci əsrin ilk rübünü geridə qoymağımıza cəmi üç il qalıb.
Dünya yaxşı və ya pis günü-gündən dəyişir. Bu dəyişikliklər həyatımızın hər sahəsinə nüfuz edir. Təbii ki, futbolumuza da. Ötən əsrdə planetin supergüc ölkələrində belə qadınlara seçmək, seçilmək hüquqununı tanınmadığını nəzərə alsaq, ölkəmizlə bu məsələdə qürur duya bilərik. Ancaq heç kimə sirr deyil ki, qanunlar çox zaman sözdə qanun olaraq qalır. Bəzən seçdiyimiz peşə ilə bağlı “bu kişi işidi, get özünə uyğun işlərlə məşğul ol” sözlərini də eşidirik. Xüsusuilə də futbolda. Müntəzəm oyunlarıın keçirildiyi normal ölkə çempionatı belə yoxdu. Klubların sayı çox azdı. Kişi futbolu ilə müqayisəsi belə absurddu. Ancaq heç birimiz bunu nəzərə almırıq. Siyasət Əsgərovun çalışdırdığı qadınlardan ibarət yığma İspaniya, Xorvatiya, İtaliya və başqa futbolda gender ayrılığının olmadığı ölkələrə uduzarkən özümüzdən çıxırıq, tənqid yağdırırıq. Ancaq sevindirici haldı ki, artıq UEFA 2023/24 mövsümündən etibarən qadın komandaları olmayan klubların ÇL-də işrakına qadağa qoyacaq. Qərarın qəbul edilməsi gündəmdədi.
Görəsən, premyer-liqada çıxış edən klublar bu dəyişikliyə hazırdı? Bunu öyrənmək üçün elita təmsilçilərinin mətbuat xidmətləri ilə əlaqə saxladıq.
Rüstəm Allahverdiyev (Neftçi):
“Klubun qızlardan ibarət komandası var. Lakin böyüklərdən ibarət komandanı nəzərdə tuturlarsa, bunun üçün ilk növbədə liqa olmalıdı. Yəni onu yaratsaq da, oynamaları üçün müntəzəm çempionat olmalıdı. Bununla bağlı bizə heç bir bildiriş gəlməyib. Nə rəsmi, nə də qeyri-rəsmi məlumat verilib”.
Anar Hacıyev (Qəbələ):
“Hələ ki mövzu ilə bağlı yekun qərar qəbul edilmədiyindən, bizim üçün hazırda gündəmdə deyil. Kluba rəsmi sənəd daxil olarsa, müzakirə aparıb yekun qərar qəbul edəcəyik”.
Elnur Həmidov (Sabah):
“Klubumuz tərəfindən hər mövsüm həm ölkə çempionatında, həm də avrokuboklarda iştirak üçün tələb olunan lisenziya şərtlərinə əməl olunur. Gələcəkdə avrokuboklarda iştirak üçün belə tələb qoyulsa, bu barədə düşünmək olar”.
Gündüz Abbaszadə (Qarabağ):
“Bununla bağlı hələ ki rəsmi məktub gəlməyib. Lakin rəsmi şəkildə bildirilərsə, təbii ki, bu yöndə işlər görüləcək. Çünki Çempionlar Liqası bizim üçün əsas prioritetdi”.
Rəşad Məmmədov (Sumqayıt):
“Sumqayıt” 2011/12 mövsümündə premyer-liqada çıxış edəndən daim qadınlardan ibarət komanda olub. Hətta bürünc medal qazandığımız mövsüm də var. Yəni bu bizdə yeni layihə deyil. Daim qızlardan ibarət komandamız fəaliyyət göstərib. Sadəcə, pandemiya ilə bağlı futbolda durğunluq olduğundan qadınlardan ibarət komandanı toparlaya bilmədik. Əslində indi də var. Lakin dediyim kimi, biz onları növbəti ölkə çempionatı üçün hazır vəziyyətə gətirəcəyik. Hətta bunu da qeyd etmək istərdim ki, əvvvəlki çempionatlarda “Sumqayıt”ın qızlardan ibarət iki komandası olub. İlləri tam dəqiq xatırlamıram, ancaq qızlarımız həm U-13, həm də U-19 liqasında iştirak edirdi”.
Elmar Abdullazadə (Zirə):
“Dediyiniz xəbərlə tanışam. Lakin bu məsələ hələ növbəti mövsümə də aid deyil. Və bildiyim qədər Çempionlar Liqası üçün nəzərdə tutulub”.
Səbuhi Məmmədov (Keşlə):
“Klubumuzun qadınlardan ibarət komandası mövcuddu”.
Qeyd edək ki, “Səbail” bu mövzu ilə bağlı da cavab vermək üçün bu günü gözləməyimizi xahiş etdi.
SƏNƏM FƏRHADOVA
Digər xəbərlər
