''Real'' dünən Çempionlar Liqasının 1/8 finalının cavab oyununda PSJ-ni ikinci hissədə vurduğu 3 qolla 3:1 hesabı ilə yenərək adını növbəti mərhələyə yazdırdı.

''Santyaqo Bernabeu''dakı görüşün final fitindən sonra qalmaqal yaşandı. Olduqca əsəbi görünən PSJ-nin sahibi Nasser Əl-Xelayfi hakim Danni Makkeliyə etirazını bildirmək üçün hakimlər otağına yollandı. Özü də o, tək yox idman direktoru Leonardo ilə birlikdə idi. Onlar otağa daxil olaraq özlərini çox aqressiv aparıblar. Hakimin otağı tərk etmək tələbinə məhəl qoymayıblar. Əl-Xelayfi hətta yan xətt hakiminin bayrağını da sındırıb. Niderlandlı Makkeli bütün bunları öz raportunda qeyd edib. Bu üzdən parislilərin sahibinə ciddi cəzalar veriləcəyi gözlənilir. Bundan başqa deyilənə görə ''Real''ın bir rəsmisi Əl-Xelayfinin əsəbi görüntüsünü telefonu ilə videoya çəkib. O da bunu görərək həmin şəxsə yaxınlaşıb və ''səni öldürərəm'' deyib. PSJ-nin əsas narazılığı birinci buraxılan qolla bağlıdı. Parislilərin fikrincə, Benzema qapıçı Donnarummaya qarşı kobudluq etsə də, hakim oyunu davam etdirdi. Baş məşqçi Maurisio Poçettino da bu qolun qeydə alınmasını ''biabırçılıq'' adlandırmışdı.