Yığmalar 16 gün ərzində dörd oyun keçirdi - Klopp 44 futbolçu çağırdı, Finlandiya FİFA-ya şikayət etdi

FİFA-nın yığmaların təqvimi ilə bağlı əl atdığı yenilik heç də birmənalı qarşılanmadı.

Bildiyiniz kimi, dünyanın ali futbol qurumu tarixdə ilk dəfə sentyabr və oktyabr fasilələrini 16 günlük vahid pəncərədə birləşdirdi. Yəni milli komandalar ayrı-ayrı iki toplanış əvəzinə bir fasilədə 4-ə qədər oyun keçirmək imkanı qazandı. İlk belə pəncərə oktyabrın 6-da qapandı. Məşqçilər bu 16 gündən fərqli şəkildə yararlandı.

Hans-Yürgen Klopp faktiki iki ayrı toplanış təşkil etdi. Almaniya yığmasının baş məşqçisi ilk iki oyun üçün 24 futbolçu çağırdı. Bu oyunlardan sonra oyunçuların əksəri klublarına qayıtdı, növbəti iki oyun üçün millinin düşərgəsinə 20 yeni futbolçu qoşuldu. Klopp qərarını sıx təqvimlə izah etdi. Bir fasilədə 4 oyun yığma üçün qeyri-adi qrafikdi, bəzi futbolçuların klub və milli komandadakı oyunları arasında lap az vaxt qalırdı. Klopp bu yolla həm yükləməni bölüşdü, həm də daha çox futbolçunı sınamaq imkanı qazandı. Amma dediyinə görə, noyabr toplanışına yalnız 23-24 futbolçu çağıracaq.

Niderland yığmasının yeni çalışdırıcısı Xavi də yeni formatı bəyənməyib. “Narıncılar” 11 gün ərzində 4 oyun keçirib. Baş məşqçi sonuncu oyun ərəfəsində artıq futbolçularda yorğunluq hiss etdiyini dedi. Toplanış vaxtı bir neçə oyunçu zədə aldı. Məsələn, topuğundan zədə alan Kodi Qakpo klubuna vaxtından əvvəl qayıtdı. Bu zədələri məhz uzun pəncərə olə bağlamaq olmaz. Ancaq Xavi problemin səbəbi kimi ümumi yüklənməni görür. Onun fikrincə, bir fasilədə 4 oyun hədsiz çoxdu. Son oyunun ardından da fikrini dəyişmədi. Belə hesab edir ki, hər fasilədə iki oyun keçirmək daha yaxşıdı.

Luis de la Fuente 4 oyun üçün 26 futbolçu çağırdı və pəncərənin gedişində heyəti dəyişdi. Ancaq belə təqvim onun da xoşuna gəlmədi. İspaniya yığması 10 gün ərzində 4 oyun keçirdi. De la Fuente belə hesab edir ki, uçuşları və fərqli ölkələrə səfəri də nəzərə alanda futbolçular hədsiz dərəcədə yüklənir.
Finlandiya isə fərqli problemlə üzləşdi. İş ondadı ki, bu dəfə problem rotasiya və ya heyət seçimi ilə bağlı deyildi. Qlen Kamara son oyun ərəfəsində yığmanın düşərgəsini tərk edərək KPR-ə qayıtdı.

Finlandiya Futbol Federasiyası iddia edir ki, İngiltərənin çempionşip təmsilçisi yarımmüdafiəçini beynəlxalq fasilə bitənə qədər qaytarmağı tələb edib. Federasiyanın baş katibi Marko Kasaqrandenin dediyinə görə, Kamara klubla yığma arasında çətin vəziyyətdə qalıb. Federasiya bu məsələni FİFA qarşısında qaldıracağını elan edib. Qurum belə hesab edir ki, qaydalar pozulub. Hələ ki FİFA-nın bununa bağlı qərarı yoxdu, yəni KPR-in qaydanı pozduğunu deməyə tələsməyək.

Əvvəllər sentyabr və ya oktyabr fasiləsi 9 gün davam edər, yığmalar iki oyun keçirərədi. İndi isə futbolçu milli komandanın düşərgəsində olduğu 16 gündə 4 oyuna çıxa bilər. Kamara məsələsində isə konkret futbolçunun klubuna nə vaxt dönəcəyi ilə bağlı mübahisə yaranıb.

Təbii ki, FİFA-nın yeniliyinə ümumi qiymət vermək baxımından bir pəncərə azdı. Ancaq görünən budu ki, yığmalar yeniliyə fərqli şəkildə uyğunlaşmağa çalışır. Onlar noyabrda yenidən 9 günlük fasilədə iki oyun keçirəcək.

Gələn payız isə yenə uzun fasilə olacaq. FİFA 2030-cu ilə qədər belə təqvimə əsaslanacaq, yəni sentyabrın sonu və oktyabrın əvvəlində yığmalara 4 oyun keçirmək üçün 16 gün ayrılacaq.