Bilindiyi kimi, “Kəpəz” yeni baş məşqçisinin Azər Məmmədov olacağını elan etsə də, onunla hələ müqavilə imzalanmadığını bildirdi. Həmçinin daha əvvəl dəfələrlə klubun yeni rəhbərinin kimliyinin bəlli olduğunu, ancaq bu barədə rəsmi açıqlama verilmədiyini yazmışıq. Məlum məsələdi ki, əvvəlcə sədr təyinatını açıqlanacaq, ardından Azər Məmmədovla müqavilə imzalanacaq.

Bəs, bu nə vaxt baş verəcək? Həmin mərasimdə azarkeşlərin də iştirakı gözlənilirmi?

Bu suallarla “sarı-göylər”in mətbuat xidmətinin rəhbəri Gəray Qiyasova müraciət etdik. O, “Football-plus.az”a açıqlamasında klubun təhvil-təslim işləriylə əlaqədar prosesin yekunlaşmaq üzrə olduğunu dedi. Əlavə etdi ki, mərasim gələn həftə olacaq. Anlaşma tədbirində yalnız klubun yeni sədri Anar Abdullayev, İdarə Heyətinin üzvü Fərman Əlizadə və Azər Məmmədov iştirak edəcək. Azarkeşlərlə görüş isə qarşıdakı günlərdə baş tutacaq.

Xatırladaq ki, “Kəpəz” yeni baş məşqçi ilə birillik müqavilə imzalayacaq. Komanda qarşıdan gələn mövsümdə ev oyunlarını Gəncə şəhər stadionunda keçirəcək.

KƏNAN BAHADIR