Elvin Cəfərquliyevin taleyinin necə olacağı bilinmir. Ölkənin güclü, iddialı klubları toplanışa başlayıb – Elvindən soraq yoxdu. Heç ona görə “Qarabağ”ın qapısını döyən də yoxdu.

2025-in ən güclü futbolçusunun durumu ilə bağlı Ağasəlim Mircavadovla danışdıq.

- Ağasəlim müəllim, Elvin Cəfərquliyevin vəziyyətindən xəbərdarsız. Bir ağsaqqal məşqçi kimi ona nə məsləhət görürsüz?
- Futbolçunun inkişafı onun klubundan, məşçqisindən asılıdı. Onun bu yerə gəlməsində, Avropada tanınmasında “Qarabağ”ın rolu böyükdü. Lakin nizam-intizam da çox önəmlidi. Baş məşqçi, məşqçilər ona hörmət edirsə, bu, qarşılıqlı olmalıdı. Düşünürəm ki, bu, düzgün qərardı. İnanmıram ki, Elvin bunu birinci dəfə edir. Mən də məşqçi olduğum müddətdə belə hadisələr yaşamışam. Heç bir məşqçi istəməz ki, yaxşı oyunçusunu itirsin. Sadəcə, məşqçi korpusu onu cəzalandırır ki, səhvini başa düşsün.

- Elvin üzərində çalışsa, Qurban Qurbanovdan üzr istəsə, yenidən heyətə qayıtmaq ehtimalı var?
- Deyə bilmərəm. Hadisənin neçənci dəfə olduğunu bilmirəm. Mən ona ağsaqqal məsləhəti verirdim ki, inkişaf edə bilirsənsə, niyə də etməyəsən?! Belə oyunçunu itirmək lazım deyil. Yerli futbolçudu. Özü başa düşməlidi ki, mən hara gedə bilərəm, nə etmişəm, niyə belə olub.

- Sizcə, Elvin üçün ən uyğun variant xarici klublara getməkdi?
- Bəli, mən əd istəyirəm ki, Cəfərquliyev yaxşı bir kluba getsin. Açığı, mən bu məsələdə bir qədər pis oluram. Gürcülər elə klublarda çıxış edirlər ki, adam həsəd aparır. Maliyyə bir qədər artan kimi futbolçular özlərini itirməməlidilər. Braziliyalı futbolçulara həsəd aparıram. “Xəzər Lənkəran”da işləyərkən üç-dörd braziliyalı futbolçum var idi. Onlar maaşının çox hissəsini ailələrinə göndərirdilər. 10 gün keçəndən sonra mənə yaxınlaşıb bonus istəyirdilər ki, pulumuzu ailəmizə göndərmişik. Bu peşəkarlıq göstəricisidi. Bizdə elə oyunçular var ki, pul olanda özlərini itirirlər.

İSRAYIL XEYRULLAYEV