Qadın voleybolçulardan ibarət millimiz Avropa Liqasında növbəti oyununu keçirib.

"Football-plus.az" xəbər verir ki, Faiq Qarayevin baş məşqçi olduğu kollektiv İspaniyada təşkil olunan ikinci turun son matçında meydan sahibi İspaniya millisi ilə qarşılaşıb.

Görüş rəqibin qələbəsi ilə yekunlaşıb - 3:1. İspaniya yığması ilk setdə 25:19 hesabı ilə üstün olub. Millimiz ikinci hissədə 25:22 hesabı ilə qalib gələrək tarazlığı bərpa edib. Lakin növbəti iki setdə 25:19 və 25:23 hesabları ilə üstün olan İspaniya yekun qələbəni qazanıb.

Beləliklə, millimiz ikinci turu bir qələbə və bir məğlubiyyətlə başa vurub. Komandamız bu mərhələdə Şimali Makedoniyanı 3:0 hesabı ilə məğlub edib, İspaniyaya isə 1:3 hesabı ilə uduzub.

Üçüncü turun oyunları 19-21 iyunda Şimali Makedoniyada keçiriləcək. Bu mərhələdə millimizin rəqibləri İsrail və İsveçrə yığmaları olacaq.