“...heç kim mənə göstəriş verə bilməz” - Rəşad Eyyubov Mezzoterodan danışdı
Şənbə günü U-21-in növbəti toplanış üçün heyəti açıqlandı. Bir ad-soyad hər kəsin diqqətini çəkdi. Söhbət Lorentso Mezzoterodan gedir.
17 yaşlı, 190 sm boya malik futbolçu mərkəz hücumçusudu. Futbola ilk addımlarını da məhz bu mövqedə atıb. “Neftçi”nin yetirməsi olan Lorentso 6 ildən çox Bakıda yaşayıb, müəyyən qədər azərbaycanca danışa bilir. O, bu mövsüm “Sampdoriya”nın U-19 komandasının heyətində ümumilikdə 31 oyuna çıxıb, 13 qol vurub, 2 məhsuldar ötürmə verib.
Bəs necə oldu ki, Lorentsonun yolu U-21 ilə kəsişdi? Məşqçilər görüb bəyəndi, yoxsa AFFA rəhbərliyi təklif etdi?
U-21-in baş məşqçisi Rəşad Eyyubov “Futbol+”in sualını cavabladı:
“Bizi AFFA və U-21 məşqçilər korpusu kimi ayırmaq düzgün deyil. Hamımızın məqsədi birdi - Azərbaycan futbolunun inkişafı. İkincisi, heç kim mənə kimi çağırıb, kimi çağırmamaq barədə göstəriş verə bilməz. Qərarları yalnız mən verirəm. Bəli, biz bu oyunçunu izləyirdik. Mən şəxsən oyununda oldum və gördüklərimdən razı qaldım. Sonda qərara gəldik ki, hazırda Lorentsonu millidə yoxlamaq üçün doğru zamandı. İtaliya çempionatının səviyyəsi bizi qane edir. Lorentsonun rəqabətli mühitdə özünü lider kimi göstərməsi gələcək inkişafına daha da inam yaradır. Eyni hal Elyas Bağci, Raul Süleymanov və Yusif Mehdiyev üçün də keçərlidi. Bundan başqa, digər çempionatlarda çıxış edən, nəzarətdə saxladığımız başqa oyunçular da var. Onlarla əlaqədəyik və izləməyə davam edirik”.
MÜZƏFFƏR QULUZADƏ
Digər xəbərlər
