Dünən futbol üzrə ölkə çempionatının 1-ci liqasında sonuncu - 27-ci tura start verildi.

İlk oyun günündə keçiriləcək matçların (MOİK - "Difai", "Cəbrayıl" - "Şimal") nəticəsinə əsasən, yarışı 9-10-cu yerlərdə başa vuracaq komandaların adlarına aydınlıq gələcəkdi. Eyni vaxtda başlayan görüşlər MOİK-in 4:0, "Şimal"ın 3:2 hesablı qələbəsiylə başa çatdı. Beləliklə, Ağsu təmsilçisi 1-ci liqanı tərk etdi! Xaçmazlılar isə 2-ci liqanı 2-ci sırada bitirən komanda - "Qaradağ Lökbatan" ilə pley-off oyununda qüvvəsini sınayacaq. Yeri gəlmişkən, "hərbçilər"in futbolçusu Seyxan Fərəcov matçdan əvvəl "Ayın qolu" layihəsi çərçivəsində aprelin ən yaxşı qoluna imza atması münasibəti ilə PFL-in Yarışların təşkili və qeydiyyatı şöbəsinin rəisi Elçin Mehtiyev tərəfindən mükafatlandırıldı.

Mövsümə bu gün keçiriləcək oyunlarla yekun vurulacaq. Əvvəlcə Binədə "Zaqatala" - "Şəfa" matçına şahidlik edəcəyik. Bu qarşılaşma bitəndən sonta başlayacaq mərasimdə mükafatçılar təltif olunacaq, qalibə - Elgiz Kərəmlinin komandasına kubok təqdim ediləcək. Eyni vaxtda start götürəcək "Şahdağ Qusar" - "Baku Sportinq" və "Mingəçevir" - "Səbail" görüşləri, heç şübhəsiz, daha maraqlı olacaq. Ona görə ki, bu matçların nəticəsi yarışı 2-ci yerdə başa vuracaq komandanın adına aydınlıq gətirəcək. Buzovna təmsilçisi qələbə qazansa belə, 2-ci pilləyə yüksəlmək ehtimalı sıfra bərabərdi. Göründüyü kimi, "Mingəçevir"in "Səbail"ə qalib gəlməkdən başqa çarəsi yoxdu. Bayıl təmsilçisi isə heç-heçə etsə belə, "futbol ili"ni 2-ci sırada bitirəcək.

MOİK (Bakı) - Difai (Ağsu) 4:0 (2:0)
M.Baxşalı, 2 (1:0). S.Yadom, 27 (2:0). S.Fərəcov, 79 (3:0). B.Soltanov, 88 (4:0).

Cəbrayıl - Şimal (Xaçmaz) 2:3 (1:0)
D.Açimi, 29 (1:0). D.Açimi, 55 (2:0). N.Osmanov, 56 (2:1). N.Şıxamirov, 64 (2:2). N.Şıxamirov, 77 (2:3).

22 may
Zaqatala – Şəfa
Binə, qəsəbə stadionu. Saat 15.30.

Şahdağ Qusar – Baku Sportinq
Şamaxı, Olimpiya İdman Kompleksinin stadionu. Saat 17.00.

Mingəçevir – Səbail
Elmin Bayramov, 14 (1:0).

[b]Xal durumu: Şəfa - 57, Səbail - 50, Mingəçevir, Baku Sportinq - 48, Şahdağ Qusar - 42, MOİK - 33, Zaqatala - 25, Cəbrayıl - 24, Şimal - 20, Difai - 18.

Bombardir: Seyxan Fərəcov (MOİK) - 18.

KƏNAN BAHADIR