Misli premyer-liqasının 30-cu turunda “Neftçi” səfərdə “Karvan-Yevlax”ı darmadağın etdi - 3:0.

“Football-plus.az” xəbər verir ki, oyunsonrası mətbuat konfransında qonaqların çalışdırıcısı Yuri Vernidub jurnalistlərin suallarını cavablayıb.

- Autsayderlə səfər matçına komandanı psixoloji baxımdan hazırlamaq çətin olmadı?
- “Qarabağ”dan sonra futbolçularda böyük emosiya var idi. Yalan deməyəcəm, bu matça görə məndə böyük həyəcan var idi. Adətən, böyük oyunlardan sonra futbolçuların emosional vəziyyəti həmişə yaxşı olmur. Biz birlikdə bunun öhdəsindən gəldik. Buna görə futbolçularıma minnətdaram.

- “Neftçi”nin avrokuboklara getməsi “Sabah”la “Zirə” arasındaı kubokun final matçından asılıdı. Həmin oyundan gözləntiniz nədi?
- Bizim üçün hər oyun finaldı. Cəmi üç oyunumuz qalıb. Hər oyunda maksimum nəticə göstərməliyik. Kubokun finalından da çox şey asılı olacaq.

- Falaye Sakoya son oyunlarda nə yedirib-içirmisiz ki, belə performans göstərir?
- Sako peşəkar futbolçudu. Ona təşəkkür edirəm. O bir oyunda yox, bütün matçlarda belə oynamalıdı. Fransa elitasında da oynamış futbolçudu. Afərin.

- Məşqçi kimi böyük yol keçmisiz, ÇL oyunları, müharibələr görmüsüz. Həqiqətənmi ötən oyun sizi bu qədər yordu?
- (gülür). Başqa səbəb yoxdu. Belə şeylər olur. Nəzərə alın ki, ilk oyunda 5:1 uduzmuşduq. Bu mənim üçün böyük, sarsıdıcı zərbə idi. Uşaqlar üçün də belə idi. O məğlubiyyətdən sonra söz tapa bilmirdim. Elə emosional idim ki, artıq nəsə deyə bilərdim. Bir daha üzrxahlıq edirəm. Bəzən olur. “Neftçi” kimi tarixi olan klubda işləmək böyük şərəfdi. Rəhbərliyə, futbolçulara, azarkeşlərə böyük hörmət edirəm. Əsas da klubun tarixinə hörmət edirəm. Önəmlisi odu ki, futbolçular dərk etməlidi ki, bu komandada oynamaq elə-belə şey deyil.

- Mövsümün sonunda kimlərin ayrılacağını müəyyənləşdirmisiz?
- Vaxtı gələndə hər şeyi deyəcəm. Çox şey yazırlar. Mən özüm də oxuyuram. Futbolçularla münaqişəm olduğunu yazırlar. Belə şey yoxdu. Nə olur-olsun, dil tapacam. Onu deyim ki, seçimlərə həssas yanaşağıq, son dərəcə diqqətli olacağıq.

- Komandanın ilk “üçlük”dən kənar qalmasının səbəbi mövsümün əvvəlində itirilən xallardı, yoxsa hakim səhvləri?
- Bu barədə çox şərh vermək istəmirəm. Məndən öncə də çoxlu xal itirilmişdi. Bu bir az fərqli mövzudu. Klub olaraq əlimizdən gələni edirik ki, ən yaxşı nəticəni göstərək.

- Kubokun final oyununu canlı izləyəcəksiz və “Sabah”a azarkeşlik edəcəksiz?
- Düzü, dəqiq bilmirəm (gülür). Bizim kubok deyil. Hansısa komandaya azarkeşlik etməyim düzgün olmaz. Güclü olan qalib gəlsin. “Sabah”ın qələbəsi bizə vacib olsa da, bunu istəmək düzgün deyil. Həyat bumeranqdı. Sonra bizim də başımıza gələ bilər.

MÜZƏFFƏR QULUZADƏ