Nəhayət, Mixail Mudrikin aqibəti müəyyənləşib. O, gözlənildiyi kimi, ağır cəzadan qaça bilməyib.

İngiltərə Futbol Assosiasiyası (İFA) “Çelsi”nin ukraynalı yarımmüdafiəçisini 4 il müddətinə futboldan uzaqlaşdırıb. Mixailin belə aqibətlə üzləşəcəyi gözlənilirdi. İFA-nın məlumatına görə, 25 yaşlı futbolçuya verilən bu ağır cəzaya səbəb onun dopinq testindən keçə bilməməsidi. Hazırda bu qərarla bağlı İdman Arbitraj Məhkəməsinə (İAM) apellyasiya şikayəti verilib.

Xatırladaq ki, Mixail 2024-cü ilin dekabrnda dopinq testindən keçə bilməməsi səbəbindən İFA tərəfindən yarışlardan kənarlaşdırılıb. Onun orqanizmində konkret hansı yasaq maddənin aşkar edildiyinə aydınlıq gətirilməyib. Ukraynalı futbolçu “Çelsi”yə 2023-cü ilin yanvarında 70 milyon avroya “Şaxtyor”dan transfer olunub. Bu, Ukrayna futbolunun tarixinə ən dəyərli keçid kimi düşüb. Onun adı londonluların iştirak ərizəsinə sonuncu dəfə premyer-liqanın 2024-cü il dekabrın 1-də keçirilən “Aston Villa” ilə oyununda (3:0) düşüb.

Mudrik paytaxt komandasında keçirdiyi 73 oyunda 10 qolun və 11 məhsuldar ötürmənin müəllifi olub.
İFA-nın hələ 2025-ci ilin fevralında müvəqqəti yarışlardan kənarlaşdırdığı futbolçu əslində bu il fevralın 26-da İAM-a şikayət edib. Bu instansiyanın şikayətə nə vaxt baxacağı hələ ki məlum deyil.

“Çelsi” rəhbərliyi yasaq maddənin futbolçunun orqanizminə qida əlavəsi ilə düşdüyünü əsas gətirməklə cəzanı yüngülləşdirməyin mümkünlüyünə ümid edir.