Cokoviçlə Alkaras Madrid turnirindən çəkildi
Serbiyalı tennisçi Novak Cokoviç Madriddə keçiriləcək “Masters” seriyalı turnirdə iştirak etməyəcəyini bildirib. O, sosial şəbəkə hesabında bunları yazıb:
“Təəssüf ki, bu il Madrid yarışlarına qatıla bilməyəcəm. Tezliklə qayıtmağım üçün bərpa prosesi davam etməlidi. Sizə hər şeyin ən yaxşısını arzulayıram”.
38 yaşlı ulduz sonuncu dəfə martda İndian-Uellsdə keçirilən “Masters” seriyalı turnirə qatılıb və 4-cü dövrədə britaniyalı Cey Dreyperə uduzub - 6:4, 4:6, 6:7 (5:7).
Reytinq siyahısında 4-cü yerdə qərarlaşan Cokoviçin ardından dünya ikincisi Karlos Alkaras da Madrid turnirini buraxacağını elan edib. 22 yaşlı idmançı bir müddət əvvəl Barselonada keçirilən turnirdə də mübarizədən erkən çəkilmişdi:
“Elə xəbərlər var ki, onları çatdırmaq çətindi. Madrid evimdi, təqvimdə mənim üçün xüsusi yerlərdən biridi, bu üzdən ardıcıl ikinci il bu şəhərdə oynaya bilməmək mənim üçün çox ağırdı. Mənim üçün böyük əhəmiyyət daşıyan adamlar önündə çıxış edə bilməyəcəyimə görə üzülürəm. Dəyişməz sevginizə görə sağ olun. Tezliklə görüşəcəyimizə ümid edirəm”.
Xatırladaq ki, Madrid turniri aprelin 22-si – mayın 3-ü aralığında keçiriləcək.
Digər xəbərlər
