“Kubok daha çox “Qarabağ”a lazım olacaq” - Arif Əsədov
Apreldə nə az, nə çox - üç dəfə “Qarabağ” - “Sabah” dueli görəcəyik. Ölkə futbolunun liderləri iki dəfə kubokda, bir dəfə də çempionatda qarşılaşacaq.
“Bayquşlar” hazırda bir oyun az keçirən “Qarabağ”dan 10 xal irəlidədi. Mövsümün sonuna da cəmi 8 tur qalıb. Dambrauskasın komandasının bu üstünlüyü əldən verəcəyi heç də real görünmür.
Bəs kubokda “Qarabağ” nə etməlidi, necə oynamalıdı? Ümumiyyətlə, bütün gücünü kuboka qoymalı, bu turniri qazanmaq üçün hətta “boyundan yuxarı tullanmalıdı”?
Arif Əsədov bununla bağlı “Football-plus.az”a açıqlama verib:
“Bu cütün oyunları finala bərabərdi. Erkən final da demək olar. Hər iki komanda çempionatda və kubokda gərgin mübarizə aparır. Gücləri də yaxındı. Kimin növbəti mərhələyə keçəcəyi proqnozunu da vermək çətindi. Təbii ki, “Sabah”ın çempionluq şansı daha yüksəkdi. 10 xallıq fərq böyükdü. Böyük ölçüdə “Sabah” çempionluğu həll edib. Titul baxımından “Qarabağ” üçün mərhələni keçmək vacibdi. “Qarabağ” həm də kuboka tam köklənməyə məcburdu. Bu turnirdə “Qarabağ”ın şansı müəyyən qədər çox görünə bilər. Hər iki komanda heyət baxımından iki cəbhədə mübarizə aparacaq gücdədi. Kubok daha çox “Qarabağ”a lazım olacaq”.
MÜZƏFFƏR QULUZADƏ
Digər xəbərlər
