Xarizma - bir şəxsin öz şəxsi cazibəsi, nitqi, davranışı və daxili inamı ilə ətrafındakı insanlara güclü təsir göstərmək, onları inandırmaq və ardınca aparmaq bacarığıdı.

Cəmiyyət arasında hörmət qazanan, nüfuz qazanan şəxs sonradan özünü hörmətdən salanda “filankəsin xarizmasına yaraşmadı” deyirlər. Qardaş Türkiyədə bu cür hallarda “karizma cizildi” ifadəsindən də istifadə olunur. Xarizmasını zədələyən insanın sonra hər şeyi bərpa etməsi, öz nüfuzunu geri qaytarması xeyli çətin olur, heç də hər dəfə itirilan nüfuzu bərpa edə bilmirsən.
Azərbaycanlı futbol hakimləri indi oxşar vəziyyətdədi. Uzun müddət hakimlərimizə xaricdən gələnlər rəhbərlik etdi. Avstriyalı gördük, türkiyəli gördük, sonra da rəhbərlik belçikalıya keçdi. AFFA-da rəhbər dəyişikliyindən sonra aparılan islahatlar, nəhayət, hakimliyə də çatdı. Futbolumuzu idarə edənlər milli komanda ilə yanaşı, Hakimlər Komitəsində də əcnəbiyə ehtiyac olmadığını qəbul etdilər.

Sabiq FİFA referisi Rəhim Həsənov Hakimlər Komitəsinə rəhbər gətiriləndə buna xeyli sevinmişdim. Çünki mən hələ Həsənovu hakim kimi xeyli bəyənmişəm, onun qətiyyətli qərarlarını dəstəkləmişəm. Heç təsadüfi deyidi ki, Rəhim Həsənov Əliyar Ağayevlə birlikdə gənc yaşlarından hakim kimi özlərini təsdiqləməyi, qısa müddətdə ölkə hakimliyinin aparıcı simasına çevrilməyi bacardılar. Elə bu iki gənc hakim layiqli şəkildə FİFA referisi adını da aldı, ölkəmizi Avropanın yaşıl meydanlarında uğurla təmsil etdi. Çox təəssüf ki, kimlərsə Rəhimin hakim kimi Azərbaycan futboluna uzun müddət xidmət etməsini əngəllədi, o da sevimli sənətindən çox erkən yaşda ayrılmalı oldu. Gec-tez haqq öz yerini tapır, layiq olan öz qiymətini alır. Bunu bir daha Rəhim Həsənovun timsalında gördük, AFFA rəhbərliyi də doğru addım ataraq ona böyük etimad göstərdi.

Rəhim Həsənov rəhbər kimi də qətiyyətini göstərməyi bacarır. Hər turdan sonra mübahisəli epizodların izahını verən sədr FİFA referiləri Əliyar Ağayevlə Elçin Məsiyevin səhvlərini ictimaiyyətə açıqlamaqdan çəkinmir. Bu da şəffaflıq baxımından xeyli zəruridi. Deyəsən, kimlərəsə mövcud durum sərf etmir, hansısa qüvvələr yenidən hakimlərə olan etimadı sarsıtmağa, bu sahədə xaos yaratmağa çalışır. Təəssüf ki, bu məsələdə “Turan Tovuz”un baş məşqçisi Kurban Berdıyev də əsas rollardan birini oynayır. Rusiyalı çalışdırıcı bilərəkdən, ya bilməyərəkdən belə mənfur qüvvələrin əlinə oynayır. Berdıyev “Qarabağ”la oyundan sonrakı mətbuat konfransında vurulan qolun üzərində ofsayd şübhəsi saldı. Sonrada məlum oldu ki, Məsiyevin səhvi Vacini meydan qovmaması olub. “Kəpəz”lə kubok oyununda Berdıyev və köməkçisi Yunis Hüseynov dozanı bir az da artırdı. Nəticədə ikisi də önündə qırmızı vərəqə gördü.

Bu vərəqələrin cəzası AFFA İntizam Komitəsi tərəfindən verildi, “Turan Tovuz” ciddi ziyana düşdü. Məşqçilər özləri də bir neçə oyun ehtiyat oyunçular skamyasında yerlərini ala bilməyəcəklər. Buna nə gərək vardı? Başa düşürəm ki, hakimlərimizin nüfuzu zədələnib, xarizması cızılıb. Amma böhranı daha da dərinləşdirmək, onların qərarlarına hər dəfə “yalançı çoban” əhvalatındakı kimi yanaşmaq olmaz. Bu cür davranış nə “Turan Tovuz” boyda kluba yaraşır, nə də Berdıyevin yaşına-başına. Səbrli olmaq lazımdı. Ümid edirəm ki, hakimlərimiz daha az səhvə yol verəcəklər, Berdıyev və onun ətrafı da daha soyuqqanlı olacaq.

AMAL